صفر پر آئوٹ ،صائم ایوب شرمناک فہرست میں رضوان کے ساتھ شامل ہوگئے

دبئی (اُردو پوائنٹ اخبارتازہ ترین - این این آئی۔ 13 ستمبر2025ء)پاکستان کے ابھرتے ہوئے بیٹسمین صائم ایوب بھی صفر پر آئوٹ ہونیو الے کھلاڑیوں کی شرمناک فہرست میں شامل ہوگئے۔عمان کیخلاف ایشیا کپ کے افتتاحی میچ میں اوپنر صائم ایوب پہلی ہی گیند پر بغیر کھاتہ کھولے پویلین لوٹ گئے۔صائم ایوب کو عمان کے بالر شاہ فیصل نے میچ کی دوسری گیند پر ایل بی ڈبلیو کیا جب وہ گیند کو لیگزائیڈ کی جانب کھیلنے کی کوشش کر رہے تھے۔

(جاری ہے)

صائم ایوب اپنے ٹی ٹوئنٹی کیریئر میں چوتھی بار ڈک پر آئوٹ ہوئے جس کے بعد وہ پاکستان کے اوپنرز کی فہرست میں محمد رضوان اور محمد حفیظ کے برابر آگئے ہیں۔اس فہرست میں سب سے آگے بابراعظم ہیں جو چھ بار صفر پر ٓئوٹ ہوئے جبکہ کامران اکمل پانچ بار صفر پر آئوٹ ہونے کے ساتھ دوسرے نمبر پر ہیں۔صائم ایوب اب ان دونوں کے بعد تیسرے نمبر پر ہیں۔ دوسری جانب حسن نواز اور شاہ زیب حسن کے تین تین صفر ہیں۔اعداد و شمار کے مطابق صائم ایوب کا ٹی ٹوئنٹی میں بیٹنگ اوسط تیس کے اوائل میں ہے جبکہ اسٹرائیک ریٹ 136.22 ہے۔ ماہرین اور شائقین کو توقع ہے کہ نوجوان بیٹر مستقبل میں زیادہ تسلسل کے ساتھ بہتر کارکردگی دکھائیں گے۔