سیکرٹری سپورٹس پنجاب کی زیرصدارت پنجاب کے کھلاڑیوں کا جدید ڈیٹا بنک رائزنگ سٹار پورٹل کی تیاری کیلئے اہم اجلاس

لاہور (اُردو پوائنٹ اخبارتازہ ترین - اے پی پی۔ 12 جون2026ء) سیکرٹری یوتھ افیئرز اینڈ سپورٹس پنجاب فضل الرحمن کی زیرصدارت پنجاب کے کھلاڑیوں کا جدید ڈیٹا بنک رائزنگ سٹار پورٹل کی تیاری کیلئے اہم اجلاس منعقد ہوا۔جمعتہ المبارک کو پنجاب سٹیڈیم میں ہونیوالے اجلاس میں پنجاب انفارمیشن ٹیکنالوجی بورڈ (پی آئی ٹی بی) کی ٹیم نے پورٹل کے بارے میں تفصیلی بریفنگ دی۔

سیکرٹری یوتھ افیئرز اینڈ سپورٹس پنجاب فضل الرحمن نے اجلاس سے خطاب کرتے ہوئے کہا کہ پنجاب رائزنگ سٹار پورٹل کے ذریعے پنجاب کے کھلاڑی اپنے آپ کو آن لائن رجسٹرڈ کرسکیں گے اور اپنی سپورٹس کی اچیومنٹس و دیگر معلومات کو پورٹل پر درج کرسکیں گے۔اس جدید نظام کے ذریعے پنجاب کے تمام اضلاع اور دوردراز علاقوں کے کھلاڑیوں کا ریکارڈ ایک ہی پلیٹ فارم پر دستیاب ہوگا،پنجاب رائزنگ سٹار پورٹل پر صوبے کے تمام شہروں کی سپورٹس سہولیات موجودہوں گی جس سے کھلاڑی اپنے علاقے میں موجود کھیلوں کی سہولیات سے فائدہ اٹھاسکیں گے۔

(جاری ہے)

سیکرٹری یوتھ افیئرز اینڈ سپورٹس پنجاب فضل الرحمن نے کہا کہ پنجاب رائزنگ سٹار پورٹل کھلاڑیوں کی ترقی اور ٹیلنٹ کی نشاندہی میں اہم کردار ادا کرے گا،پنجاب کے دوردراز علاقوں میں موجود باصلاحیت کھلاڑیوں کو سامنے لانے اور انہیں بہتر مواقع فراہم کرنے میں یہ منصوبہ معاون ثابت ہوگا، پورٹل کی مدد سے مختلف کھیلوں میں نوجوانوں کی دلچسپی کے حوالے سے اعداد وشمار بھی حاصل کیے جاسکیں گے، جس کی بنیاد پر مستقبل کی کھیلوں سے متعلق پالیسی سازی کو مزید موثر بنایا جائے گا۔

فضل الرحمن نے کہا کہ پنجاب رائزنگ سٹار کی تیاری کا عمل جلد مکمل کیا جائے تاکہ پنجاب رائزنگ سٹار پورٹل کو جلد از جلد کھلاڑیوں کیلئے اوپن کیا جاسکے۔اجلاس میں ایڈیشنل سیکرٹری شبیر حسین چیمہ، ڈائریکٹر ایڈمن عابد شوکت اور ڈائریکٹر یوتھ افیئرز محمد فہد نے شرکت کی جبکہ پنجاب انفارمیشن ٹیکنالوجی بورڈ کی ٹیم نے آن لائن شرکت کی۔