ایف آئی ایچ ویمنز نیشنز کپ ، بھارت اورنیوزی لینڈ نے سیمی فائنل میں جگہ بنا لی

لاہور (اُردو پوائنٹ اخبارتازہ ترین - اے پی پی۔ 16 جون2026ء) ایف آئی ایچ ویمنز نیشنز کپ 2025-26 کے دوسرے روز پول مرحلے کے مقابلوں میں بھارت اور میزبان نیوزی لینڈ نے مسلسل دوسری کامیابی حاصل کرتے ہوئے سیمی فائنل میں جگہ پکی کر لی، جبکہ امریکا نے یوراگوئے کو شکست دے کر ایونٹ میں واپسی کی اور کوریا و فرانس کا میچ برابر رہا۔پول اے کے میچ میں امریکا نے یوراگوئے کو 2-7 سے شکست دی۔

امریکا کی جانب سے ابیگیل ٹیمر نے شاندار کھیل کا مظاہرہ کرتے ہوئے چار گول اسکور کیے اور پلیئر آف دی میچ قرار پائیں۔ امریکا نے پہلے ہاف میں ہی 1-5 کی برتری حاصل کر لی تھی جس کے بعد یوراگوئے کی ٹیم میچ میں واپسی نہ کر سکی۔ایک اور اہم میچ میں بھارت نے جاپان کو سنسنی خیز مقابلے کے بعد 1-2 سے شکست دی۔

(جاری ہے)

پہلے ہاف میں دونوں ٹیمیں گول کرنے میں ناکام رہیں، تاہم تیسرے کوارٹر میں سلیمہ ٹیٹے نے بھارت کو برتری دلائی۔

جاپان نے جلد ہی برابر ی کر دی لیکن بعد ازاں لالریمسیا می نے فیصلہ کن گول کر کے بھارت کو فتح دلائی۔ سلیمہ ٹیٹے کو پلیئر آف دی میچ کا اعزاز ملا۔پول بی کے مقابلے میں کوریا اور فرانس کے درمیان میچ 1-1 گول سے برابر رہا۔ فرانس نے تیسرے کوارٹر میں ایما وان ڈیر زینڈن کے ذریعے برتری حاصل کی، تاہم کوریا نے چوتھے کوارٹر میں پنالٹی کارنر پر گول کر کے مقابلہ برابر کر دیا۔

فرانس کی گول کیپر لوسی ایرمان کی عمدہ کارکردگی پر انہیں پلیئر آف دی میچ قرار دیا گیا۔دن کے آخری اور اہم مقابلے میں نیوزی لینڈ نے چلی کو 2-3 سے شکست دے کر سیمی فائنل تک رسائی حاصل کر لی۔ چلی نے ابتدا میں برتری حاصل کی تھی لیکن نیوزی لینڈ نے دوسرے ہاف میں شاندار واپسی کرتے ہوئے تین گول اسکور کیے۔ جوزفین مرے نے فیصلہ کن گول کر کے میزبان ٹیم کی کامیابی یقینی بنائی۔ کیسی کرالے کو پلیئر آف دی میچ کا ایوارڈ دیا گیا۔دو روزہ مقابلوں کے بعد بھارت اور نیوزی لینڈ اپنی اپنی پولز میں مسلسل دو کامیابیوں کے ساتھ سیمی فائنل کے لیے کوالیفائی کر چکے ہیں، جبکہ دیگر ٹیموں کے درمیان اگلے مرحلے میں رسائی کے لیے مقابلہ جاری ہے۔