سابق بھارتی کپتان روہت شرما 2027 ورلڈ کپ کھیلنے کیلئے پر عزم

اگر کرکٹ کے ساتھ شور شرابا نہ ہو تو کھیل کا مزہ بھی نہیں آتا : تجربہ کار بیٹر

ذیشان مہتاب منگل 21 جولائی 2026 11:51

سابق بھارتی کپتان روہت شرما 2027 ورلڈ کپ کھیلنے کیلئے پر عزم

ممبئی (اردو پوائنٹ تازہ ترین اخبار ۔ 21 جولائی 2026ء ) بھارتی کرکٹ ٹیم کے سابق کپتان اور تجربہ کار اوپنر روہت شرما نے اپنی ممکنہ ریٹائرمنٹ سے متعلق گردش کرنے والی خبروں پر پہلی بار کھل کر ردعمل دیتے ہوئے واضح کیا ہے کہ ان کی تمام تر توجہ بھارت کی نمائندگی کرنے اور ٹیم کی کامیابی میں اپنا کردار ادا کرنے پر مرکوز ہے۔

غیر ملکی میڈیا رپورٹس کے مطابق 39 سالہ روہت شرما نے انگلینڈ کے خلاف تیسرے اور آخری ایک روزہ میچ میں شاندار 138 رنز کی اننگز کھیلنے کے بعد ریٹائرمنٹ سے متعلق قیاس آرائیوں کو مسترد کر دیا۔

رپورٹس میں دعویٰ کیا جا رہا تھا کہ لارڈز میں کھیلا گیا یہ میچ روہت شرما کے ون ڈے کیریئر کا آخری مقابلہ ثابت ہو سکتا ہے، تاہم بھارتی بلے باز نے ان خبروں کو محض افواہیں قرار دیتے ہوئے انہیں کوئی اہمیت دینے سے انکار کر دیا۔

(جاری ہے)

بھارتی کرکٹ بورڈ (بی سی سی آئی) سے گفتگو کرتے ہوئے 39 سالہ روہت شرما نے کہا کہ ان کی بنیادی ذمہ داری بیٹنگ کرنا، میدان میں اتر کر اپنے ملک کی نمائندگی کرنا اور ٹیم کی کامیابی میں بھرپور کردار ادا کرنا ہے۔

انہوں نے کہا کہ اپنے بین الاقوامی کیریئر کے آغاز سے آج تک وہ اسی مقصد کے لیے کھیل رہے ہیں اور آئندہ بھی یہی عزم برقرار رہے گا، کیریئر کے آغاز سے ہی ان کے بارے میں مختلف افواہیں اور تبصرے ہوتے رہے ہیں اور جب تک وہ کرکٹ کھیلتے رہیں گے، یہ سلسلہ جاری رہے گا۔

ان کے مطابق ایسی باتیں ان کی توجہ پر اثر انداز نہیں ہوتیں، کیونکہ ان کے لیے سب سے اہم چیز میدان میں اپنی کارکردگی اور ٹیم کی کامیابی ہے، انہوں نے مسکراتے ہوئے کہا کہ اگر کرکٹ کے ساتھ شور شرابا نہ ہو تو کھیل کا مزہ بھی نہیں آتا۔

واضح رہے کہ روہت شرما اس سے قبل بھی اپنی خواہش کا اظہار کر چکے ہیں کہ وہ 2027ء کے آئی سی سی ون ڈے ورلڈ کپ میں بھارت کی نمائندگی کرنا چاہتے ہیں، جس کی مشترکہ میزبانی جنوبی افریقا، زمبابوے اور نمیبیا کریں گے۔

وقت اشاعت : 21/07/2026 - 11:51:06