رمضان کی آمد اور ہماری ترجیحات‎

ندا موبائل ہاتھ میں تھامے کپڑوں کی ایک مشہور برانڈ کی جانب سے ابھی ابھی اپ لوڈ ہونے والی ویڈیو دیکھ رہی تھی جس میں دکھایا جارہا تھا کہ یوم پاکستان کے موقع پر ہر آئٹم پر پچاس٪(٥٠)آف ہے۔اس نے بہت دلچسپی سے پوری وڈیو دیکھی اور یہ نتیجہ نکالا  کے چھ ہزار والا سوٹ تین ہزار میں اور آٹھ ہزار والا تھری پیس سوٹ چار ہزار میں مل جاۓ گا۔

۔۔۔ اسکے ذہن میں فوراً خیال آیا کہ "رمضان المبارک قریب ہے، شب قدر کی مبارک راتیں اور پھر جمعتہ الوداع۔۔۔۔۔ موقعہ اچھا ہے،ابھی سے خریداری کر لی جاۓ اور وہ بھی سیل پرائس میں"۔۔۔۔۔ انتہائ سرعت کے ساتھ اس نے یہ وڈیو اپنی بہن اور بھاوج کو شئیر کی تاکہ ایک دوسرے کے مشوروں سے فائدہ اٹھاتے ہوۓ کامیاب شاپنگ کی جاۓ، بہن اور بھاوج فوراً تیار ہوگئیں اور گھر کے قریب ایک آوٹ لٹ میں موجود ھجوم میں، وہ بھی شامل ہوگئیں۔

(جاری ہے)

۔۔
رمضان المبارک کی آمد  سے قبل ہی کپڑوں کی تمام مشہور، برانڈز پچیس سے پچاس فی صد سیل کی خوشخبری دینے لگتی ہیں۔اشتہارت میں جتنا آف دکھایا جا رہا ہوتا ہے فی الحقیقت اتنا ہو یا نہ ہو مگر۔۔۔۔ شہر کی آوٹ لٹس کے اندر مردو خواتین کا بے پناہ ہجوم ایسے امڈ امڈ کر آتا ہےگویا مفت میں مال بٹ رہا ہو۔  
 بہت سی خواتین ماہ مبارک کی آمد سے ایک ماہ قبل ہی عید کی تیاری کے حوالے سے کمر کس لیتی ہیں۔

میں بذات خود شاھد ہو ں ایسی خواتین کی جو رمضان المبارک سے قبل مارکیٹوں کے چکر  لگا لگا کر خود کو ہلکان کر لیتی ہیں۔ کوئ بچت بازار،کوئ آوٹ لٹ اور کوئ مال ایسا نہیں رہ جاتاجہاں انہوں نے نہ جھانک لیا ہو۔
اس میں کوئ شک نہیں ماہ مبارک کی آمد سے قبل کی اس بھاگ دوڑ کے حوالے سے بیشتر خواتین کا نقطہ نظر یہ ہوتا ہے کہ رمضان میں وقت گھر پر گذاریں گی۔

۔۔۔۔  مگر اسمیں بھی کو ئ مبا لغہ نہیں کہ کسی کے پیش نظر وہ جدوجہد نہیں ہوتی جسکا  رمضان متقاضی ہے اور جسکا درس نبیۖ کے اسوۂ طیبہ سے ملتا ہے۔
ادھر سوشل میڈیا پر تمام کونگ چینلز سحر و افطار کے حوالے سے طرح طرح کی ریسیپیز آپ لوڈ کرنے لگتے ہیں۔ریسیپیز کی گویا برسات ہونے لگتی ہے۔جن کے سلوگنز بھی برے زبردست ہوتے ہیں مثلاً "رمضان میں لچھے دار پکوڑے بنائیں اور سب سے داد پائیں۔

" "یہ رول ابھی سے بنا کر فریز کر دیں اور پورے رمضان اس کے مزے لیں۔" "پہلی سحری میں یہ پراٹھے بنا کر سب کےدل جیت لیں۔"
ماحول ایسا بن گیا پے کہ ہر فرد اس دوڑ میں سرپٹ بھاگ رہا ہے۔ اور مجھ سمیت ہر ایک کی نظروں سے وہ اعلی و ارفع مقصد اوجھل ہے جسکے لیۓ یہ مقدس مہینہ سایہ فگن ہوتا ہے۔
بدقسمتی سے سہانے سپنے دکھا کر بر سر اقتدار آنے والی ہر حکومت کی ناکام معاشی پالیسیوں کے طفیل وطن عزیز میں رمضان المبارک کی آمد سے قبل ہی اشیاۓ صرف کی قیمتوں میں ہو شربا اضافے کی نویدیں ملنے لگتی ہیں۔

تین اپریل کی اخباری اطلاع کے مطابق:"رمضان سے قبل مہنگائ کا طوفان۔۔یوٹیلیٹی اسٹورز کے نرخ بڑھ گۓ۔ چینی،گھی،دودھ،دہی،آٹا،آلو اور ٹماٹر بھی مہنگے،ہفتہ وار مہنگائ کی شرح21 .17 فیصد پر پہنچ گئ۔
چنانچہ گھر کی کفالت کرنے والے اس فکر میں غلطاں  ہو جاتے ہیں کہ اس ہوشربا اضافے سے قبل جتنا ممکن ہو سکے اشیاۓ صرف سے گھر بھر لیں
فی الحقیقت دیگر تمام مسلم ممالک میں رمضان المبارک کے حوالے سے شاپنگ مالز اور اسٹورز قیمتوں میں رعایت دیتے ہیں بلکہ بہت سے غیر مسلم ممالک میں بھی مسلم کمیونٹی کے لیۓ اشیاۓ صرف کی قیمتوں میں کمی کے علاوہ مختلف آفرز اور پیکیچز لاۓ جاتے ہیں۔

اگر یہی سہو لیات وطن عزیز میں بھی ہوں تو شاید صورتحال کافی مختلف ہو اور وہ بھاگ دوڑ نہ کرنا پڑے جو رمضان سے قبل اشیاۓ صرف کو ذخیرہ کرنے کے لیۓ کرنا پڑتی ہے۔
آقاۓ دو جہاںۖ آمد رمضان سے قبل اپنے خطبوں میں رمضان کی اہمیت و فضیلت کا کثرت سے ذکر فرماتے تاکہ اسکی رحمتوں کے حصول کا شوق پیدا ہو۔نبی مہربانۖ شعبان میں کثرت سے روذے رکھ کر رمضان المبارک کا استقبال فرماتے۔

رحمتوں کا مہینہ ایک بار پھر سایہ فگن ہونے کو ہے۔نبیۖ کے فرمان کے مطابق وہ ماہ جس کی آمد پر فرشتے ہر دن اور ہر رات صدائیں لگاتے ہیں۔"اے خیر کے طالب متوجہ ہو اور آگے بڑھ اور اے شر کے طالب رک جا۔"(ترمذی،ابن ماجہ)
رحمتوں اور مغفرتوں کی لوٹ سیل لگنے والی ہے۔ نہ صرف سیل ہے بلکہ آفرز بھی ہیں۔کہ نفل کا ثواب فرض کے برابر اور ایک فرض کا ثواب ستر گنا بڑھا کے دیا جا رہا ہے۔

جنت کے تمام در وا ہونے والے ہیں جنت سےنجات پانے کے لیۓ صدائیں لگنے والی ہیں۔آقاۖ کے ایک فرمان کے مطابق: "بلاشبہ ہر سال ماہ رمضان میں جنت کی تزئین و آرائش کی جا تی ہے۔"(بحوالہ طبرانی)
ضروری ہے کہ رمضان کی آمد سےقبل کی تمام تر تیاریوں میں روحانی تیاری کا اھتمام بھی شامل کیا جاۓ ۔۔۔۔مبادہ کہیں ایسا نہ ہو کہ مادیت سمیٹنے میں اس قدر محو ہو جائیں کہ رحمتوں اور برکتوں کے فیضان کا سمندر بہتا رہے مگر ہماری جھولی اس سے تر بھی نہ ہو سکے۔۔۔۔۔۔۔