وفاقی دارالحکومت سمیت پنجاب ،خیبر پختونخوا اورآزادکشمیر میں موسلادھار بارش ، گرمی میں لوڈشیڈنگ کے ستائے روزہ داروں نے سکھ کاسانس لیا ، موسلادھار بارش سے گرمی اور لو سے مرجھائے چہرے خوشی سے کھل اٹھے

اسلام آباد/لیہ/لاہور (اُردو پوائنٹ اخبار تازہ ترین۔ 07 جولائی۔2015ء ) وفاقی دارالحکومت سمیت پنجاب ،خیبر پختونخوا اورآزادکشمیر میں موسلادھار بارش سے گرمی میں لوڈشیڈنگ کے ستائے روزہ داروں نے سکھ کاسانس لیا ، موسلادھار بارش سے گرمی اور لو سے مرجھائے چہرے خوشی سے کھل اٹھے ، پنجاب سمیت مختلف علاقوں میں بارش سے نشیبی علاقے زیرآب آ گئے اور پانی گھروں میں داخل ہونے سے مکینوں کو شدید مشکلات کا سامنا کرنا پڑا،فیصل آباد میں گھر کی دیوار گرنے سے دو افراد زخمی جبکہ لاہور میں تہہ خانے میں بارش کا پانی جمع ہونے سے زیرتعمیر چار منزلہ پلازہ گر گیا، کوئی جانی نقصان نہیں ہوا،لاہور میں موسلادھار بارش سے دھرم پورہ اور جیل روڈ کے انڈر پاس پانی سے بھر گئے، کینال روڈ پر گاڑیوں کی لمبی قطاریں لگ گئیں، وسن پورہ، گھوڑے شاہ، مصری شاہ، نسبت روڈ اور لکشمی چوک کے علاقوں میں گھنٹوں پانی کھڑا رہا،محکمہ موسمیات نے آئندہ 24 سے 36 گھنٹوں کے دوران مزید بارش کی پیشنگوئی کی ۔

(جاری ہے)

منگل کو اسلام آباد، راولپنڈی، فیصل آباد، لاہور، ننکانہ صاحب، چیچہ وطنی، نارووال، وہاڑی سمیت پنجاب کے مختلف علاقوں میں بارش کا سلسلہ رات بھر جاری رہا جس سے نشیبی علاقے زیرآب آ گئے اور پانی گھروں میں داخل ہونے سے مکینوں کو شدید مشکلات کا سامنا کرنا پڑا۔فیصل آباد میں گھر کی دیوار گرنے سے دو افراد زخمی ہو گئے۔ لاہور کے علاقے ملت پارک میں تہہ خانے میں بارش کا پانی جمع ہونے سے زیرتعمیر چار منزلہ پلازہ گر گیا، کوئی جانی نقصان نہیں ہوا۔لاہور میں موسلادھار بارش سے دھرم پورہ اور جیل روڈ کے انڈر پاس پانی سے بھر گئے جس کے باعث کینال روڈ پر گاڑیوں کی لمبی قطاریں لگ گئیں۔