پنجاب میں سردی کا زور کم ہونے لگا،بلوچستان اور سندھ میں موسم گرم

لاہور /کوئٹہ (اُردو پوائنٹ اخبارتازہ ترین - آئی این پی۔ 14 مارچ2017ء) پنجاب کے مختلف شہروں میں حالیہ بارش اور ژالہ باری کا سلسلہ رکنے کے بعد سردی نے اپنا زور کھودیا۔ بلوچستان اور سندھ کے بیشتر حصوں میں سورج چھایا رہا۔ ملک کے بالائی علاقوں میں برفباری اور بارش کے رکتے ہی سردی کی شدت میں کمی آرہی ہے۔ آزادکشمیرمیں چند ایک مقامات پر سرد ہواؤں کا زور برقرار ہے۔

پنجاب کے بیشترحصوں میں بارشوں کا زور ٹوٹتے ہی سرد ہوائیں چلنا بند ہوگئی ۔ سندھ کے میدانی علاقوں میں سورج نے اپنا اثر دکھانا شروع کردیا ہے۔ کراچی میں دن بھر کڑکتی دھوپ چھائی رہی۔حیدرآباد ، سکھر، لاڑکانہ ، جیکب آباد اور خیرپور سمیت سندھ کے کئی شہر سورج کی لپیٹ میں رہے۔بلوچستان میں کوئٹہ ، چمن ، حب اور سبی کا موسم بھی گرم رہا۔

(جاری ہے)

آئندہ 24گھنٹوں میں ملک کے بیشتر علاقوں میں موسم سرد اور خشک رہے گا تاہم کوئٹہ،ژوب ڈویژن میں کہیں کہیں جبکہ قلات،مکران، مالاکنڈ ڈویژن، فاٹا اور گلگت بلتستان میں چند مقامات پر تیز ہواوٰ ں اور گرج چمک کے ساتھ بارش کا امکان ہے۔

آئندہ 48گھنٹوں میں ملک کے بیشتر علاقوں میں مطلع ابر آلود رہے گا تاہم کوئٹہ،ژوب ڈویژن میں کہیں کہیں جبکہ قلات، مالاکنڈ، ہزارہ ، پشاور، راولپنڈی ڈویژن، فاٹا اور گلگت بلتستان میں چند مقامات پر تیز ہو اؤں اور گرج چمک کے ساتھ ہلکی بارش کا امکان ہے۔گزشتہ 24 گھنٹوں میں ملک کے بیشتر علاقوں میں موسم سرد اور خشک رہا۔