آزاد کشمیر کی تعمیر و ترقی اور لوگوں کے بنیادی مسائل کا حل ہماری اولین ترجیح ہے، بھارت کو ظلم کا یہ بازار بند کرنا ہو گا اور مقبوضہ کشمیر کے لوگوں کو حق خودارادیت دے کر اقوام متحدہ میں اپنا کیا ہوا وعدہ نبھانا پڑے گا

صدر آزاد جموں وکشمیر سردار مسعود خان کا بنی نکہ سنگولہ کے مقام پر عوامی اجتماع سے خطاب

بدھ 3 جنوری 2018 14:10

راولاکوٹ ۔ (اُردو پوائنٹ اخبارتازہ ترین - اے پی پی۔ 03 جنوری2018ء) صدر آزاد جموں وکشمیر سردار مسعود خان نے کہا ہے کہ آزاد کشمیر کی تعمیر و ترقی اور لوگوں کے بنیادی مسائل کا حل ہماری اولین ترجیح ہے ، سنگولہ کے عوام نے جس طرح والہانہ استقبال کیا اس پر دل کی اتھا ہ گہرائیوں سے شکر گزار ہوں۔ بدھ کو یہاں بنی نکہ سنگولہ کے مقام پر عوامی اجتماع سے خطاب کرتے ہوئے صدر آزاد کشمیر نے کہا کہ ہمارے وسائل کم اور مسائل زیادہ ہیں، اہل ثروت اور خوشحال لوگوں کو آگے بڑھ کر عوام کی خوشحالی اور تعمیر و ترقی کے لیے اپنا کردار ادا کرنا ہوگا۔

سردار مسعود خان نے کہا کہ آج آزاد کشمیر کے لوگ تو آزاد ہیں لیکن مقبوضہ کشمیر میں ہمارے بھائی اور بہنیں آزادی کی نعمت سے محروم ہیں۔

(جاری ہے)

مقبوضہ کشمیر میں بھارتی افواج دہشت گردی کر رہی ہیں، وہاں انسانی حقوق کی سنگین پامالیاں ہو رہی ہیں۔ صدر نے کہا کہ ہندوستانی افواج ایل او سی پر بلا اشتعال فائرنگ کر کے نہتے اور معصوم لوگوں کو شہید کر رہی ہیں، ہندوستان کو ظلم کا یہ بازار بند کرنا ہو گا اور مقبوضہ کشمیر کے لوگوں کو حق خودارادیت دے کر اقوام متحدہ میں اپنا کیا ہوا وعدہ نبھانا پڑے گا۔

جلسے سے زین اکبر ، پروفیسر شریف نثار ، ملک عاشق اعوان ، عارف مغل ، نسیم اعوان ، مشہود اور عبد الرزاق نے بھی خطاب کیا۔ جلسہ کی صدارت زین اکبر نے کی جبکہ نشاط حسین نے سٹیج سیکرٹری کے فرائض سرانجام دئیے۔ بعد ازاں صدر آزاد کشمیر نے سنگولہ میں مختلف منصوبہ جات کا بھی معائنہ کیا ۔