شاہد آفریدی کی بین الاقوامی کرکٹ میں پھر سے واپسی، ٹیم کا حصہ بنا لیا گیا

جمعرات 19 اپریل 2018 18:12

لاہور (اُردو پوائنٹ اخبارتازہ ترین۔ 19 اپریل2018ء) پاکستانی مایہ ناز آل رائونڈر شاہد خان آفریدی اور شعیب ملک آئندہ ماہ ویسٹ انڈیز کے خلاف شیڈول ٹی ٹونٹی چیریٹی ٹی ٹونٹی انٹرنیشنل کرکٹ میچ میں آئی سی سی ریسٹ آف ورلڈ الیون کی نمائندگی کریں گے۔

(جاری ہے)

میڈیا رپورٹ کے مطابق آئی سی سی نے کالی آندھی کے خلاف شیڈول میچ کیلئے فرسٹ گروپ آف پلیئرز کا اعلان کر دیا ہے جن میں شاہد آفریدی، شعیب ملک اور سری لنکا کے تھسارا پریرا شامل ہیں، بقیہ سکواڈ کا اعلان آئندہ ہفتوں میں کیا جائے گا، آفریدی نے مارچ 2016ء میں آخری ٹی ٹونٹی انٹرنیشنل میچ کھیلا تھا اور اب وہ تھوڑی دیر کیلئے دوبارہ انٹرنیشنل کرکٹ میں کم بیک کریں گے۔

آفریدی نے اپنے بیان میں کہا کہ مجھے اس بات کی خوشی ہے کہ عظیم مقصد کیلئے میرا انتخاب کیا گیا، کرکٹ میں سب کھلاڑی ایک فیملی کی طرح ہوتے ہیں، ہمارا پیشہ اور اخلاقی فرض بھی یہی ہے کہ ضرورت کے وقت سب اکٹھے ہو جائیں۔ شعیب ملک نے کہا کہ لارڈز میں اس میچ کے انعقاد سے اس کی اہمیت مزید بڑھ گئی ہے، میری اس گرائونڈ سے اچھی یادیں وابستہ ہیں، کوشش ہو گی کہ عمدہ کارکردگی کا مظاہرہ کر کے ٹیم کو کامیابی دلانے میں کردار ادا کروں۔