لاہور ہائیکورٹ، ایم کیو ایم لندن کے قائد کے بیانات کی اشاعت اور نشریات پر پابندی کے لیے درخواستوں پر کارروائی کی سماعت

اگر معاملہ آیا تو اسکا جائزہ لیں گے، فل بنچ کے قصور میں حکمران جماعت کے اراکین اسمبلی کی جانب سے عدلیہ بارے تضحیک آمیز احتجاج سے متعلق ریمارکس

جمعرات 19 اپریل 2018 22:46

لاہور (اُردو پوائنٹ اخبارتازہ ترین - آن لائن۔ 19 اپریل2018ء) لاہور ہائیکورٹ کے فل بنچ نے قصور میں حکمران جماعت کے اراکین اسمبلی کی جانب سے عدلیہ کے بارے میں تضحیک آمیز احتجاج کرنے سے متعلق ریمارکس دیتے ہوئے کہا ہے کہ اگر یہ معاملہ ان کے پاس آیا تو اسکا جائزہ لیں گے۔

(جاری ہے)

لاہور ہائیکورٹ کے جسٹس مظاہر علی اکبر نقوی کی سربراہی میں تین رکنی فل بنچ نے ایم کیو ایم لندن کے قائد کے بیانات کی اشاعت اور نشریات کی پابندی کے لیے درخواستوں پر کارروائی کی سماعت کی، سماعت سے قبل بنچ کے سربراہ جسٹس مظاہر علی اکبر نقوی نے قصور میں عدلیہ مخالف احتجاج پر افسوس کا اظہار کیا اس پر اظہر صدیق ایڈووکیٹ نے نشاندہی کی کہ حکمران جماعت کے ارکان اسمبلی کے توہین آمیز احتجاج کی ویڈیو سامنے آنے کے بعد مقدمہ تو درج کر لیا گیا ہے مگر مقدمے میں نرم دفعات شامل کی گئی ہیں اور جرم کے مطابق دفعات کو مقدمے کا حصہ نہیں بنایا گیا اظہر صدیق ایڈووکیٹ نے آگاہ کیا کہ مقدمے میں جرم کے مطابق دفعات شامل کرنے کے لیے آئی جی پولیس پنجاب کو خط لکھ دیا گیا ہے،بنچ کے سربراہ نے کہا کہ اگر یہ معاملہ ان کے پاس آیا تو ان کا اسوقت جائزہ لیا جائے گا ابھی دوسرا معاملہ زیر سماعت ہے بنچ کے روبرو وفاقی حکومت نے ایم کیو لندن کے قائد کی تقاریر کی نشریات پر پابندی کی رپورٹ پیش کر دی گی،لاہور ہائیکورٹ نے عدالتی احکامات پر عملدرآمد پر اطمینان کا اظہار کیا اور درخواستوں پر آئیندہ کارروائی 10 مئی تک ملتوی کر دی۔