مسلم لیگ(ن) اور پی ٹی آئی کے اندر کے کھوٹ کی وجہ سے کے پی اور پنجاب میں نگران وزیراعلیٰ کی تقرری پانی پت کی جنگ بن گئی ہے ،ْ نیئر حسین بخاری

جمعہ 1 جون 2018 22:47

اسلام آباد (اُردو پوائنٹ اخبارتازہ ترین - این این آئی۔ 01 جون2018ء) پاکستان پیپلز پارٹی کے سیکرٹری جنرل سید نیر حسین بخاری کہا ہے کہ مسلم لیگ(ن) اور پی ٹی آئی کے اندر کے کھوٹ کی وجہ سے کے پی اور پنجاب میں نگران وزیراعلیٰ کی تقرری پانی پت کی جنگ بن گئی ہے۔

(جاری ہے)

پی ٹی آئی کے فیصلوں کے حوالے سے ردعمل کااظہار کرتے ہوئے پیپلزپارٹی کے سیکریٹری جنرل نے کہا کہ پاکستان پیپلزپارٹی ملک میں منصفانہ اور شفاف انتخابات کی خواہاں ہے اس لئے وفاق اور سندھ میں جہاں پاکستان پیپلزپارٹی کی فیصلہ کن نمائندگی ہے وہاں نگران وزیراعظم اور نگران وزیراعلیٰ کی تقرری عمل میں آ چکی ہے۔

نیر بخاری نے کہا کہ پی ٹی آئی کا طرز عمل کبھی بھی سیاسی اور جمہوری نہیں رہا۔ یہی وجہ ہے کہ کے پی اور پنجاب میں نگران وزیراعلیٰ کی تقرری عمل میں نہیں آئی۔ انہوں نے کہا کہ دراصل سارا مسئلہ عمران نیازی کی ذہنیت کا ہے کیونکہ انہیں اپنی ذات کے سوا کوئی شخص ایماندار نظر نہیں آتا۔ نیر بخاری نے کہا کہ ن لیگ اور پی ٹی آئی کے درمیان نورا کشتی ہو رہی ہے۔ انہوں نے کہا کہ کوئی غلط فہمی میں نہ رہے کہ انہیں انتخابی نتائج چوری کرنے دئیے جائیں گے۔ پاکستان پیپلزپارٹی کے جیالے پوری طاقت سے دھاندلی کو روکنے کی صلاحیت رکھتے ہیں۔