این اے 99 میں پی ٹی آئی کارکن کی مبینہ دھاندلی کی کوشش

چنیوٹ (اُردو پوائنٹ تازہ ترین اخبار۔ 25 جولائی 2018ء) : چنیوٹ کے حلقہ این اے 99 میں پی ٹی آئی کارکن کی جانب سے مبینہ دھاندلی کی کوشش سامنے آئی ہے۔ میڈیا رپورٹ کے مطاق پی ٹی آئی کارکن نے این اے 99 کے پولنگ اسٹیشن نمبر 125 میں ووٹر سے بیلٹ پیپر باہر منگوا لیا ، ووٹر کے بیلٹ پیپر نہ دینے پر پی ٹی آئی نے پیپر چھیننے کی کوشش بھی کی۔ذرائع کے مطابق پی ٹی آئی کے کارکن کی شناخت محمد عمیر کے نام سے ہوئی ہے جس نے پولنگ ایجنٹ سے مبینہ طور پر بیلٹ پیپر باہر منگوایا اور دھاندلی کی کوشش کی۔

پی ٹی آئی کارکن کی جانب سے دھاندلی کی کوشش پر الیکشن کمیشن کی انتظامیہ حرکت میں آ گئی اور پولنگ اسٹیشن پر فی الوقت دھاندلی کا عمل روک دیا گیا ہے۔ جبکہ پولنگ اسٹیشن کا کنٹرول پاک فوج ، پولیس اور دیگر سکیورٹی اداروں نے سنبھالا ہوا ہے۔

(جاری ہے)

واضح رہے کہ عام انتخابات 2018ء کے پیش نظر ملک بھر میں پولنگ کا عمل شروع ہو گیا ہے۔ ملک بھر سے آج 10 کروڑ 59 لاکھ 55 ہزار 409 ووٹرز حق رائے دہی استعمال کریں گے۔

پولنگ کا عمل صبح 8 بجے سے شام 6 بجے تک جاری رہے گا۔آج قومی اسمبلی کے 272 میں سے 270 حلقوں جب کہ صوبائی اسمبلیوں کے 577 میں سے 570 حلقوں کے لیے پولنگ ہو گی اور ووٹرز اپنے پسندیدہ اُمیدوار کو ووٹ دیں گے۔ یہاں یہ امر قابل ذکر رہے کہ عام انتخابات 2018ء میں قومی اور صوبائی اسمبلیوں کے 8 حلقوں پر انتخابات ملتوی کیے گئے ہیں، جہاں الیکشن اب بعد میں ہوں گے۔

جن حلقوں میں آج انتخابات نہیں ہو رہے، ان میں قومی اسمبلی کے دو حلقے این اے 60 راولپنڈی اور این اے 103 فیصل آباد جبکہ صوبائی اسمبلی کے حلقے پی کے 78 پشاور، پی کے 99 ڈیرہ اسماعیل خان، پی پی 87 میانوالی، پی پی 103 فیصل آباد، پی ایس 87 ملیر اور پی بی 35 مستونگ شامل ہیں۔اس کے علاوہ سندھ اسمبلی کے حلقے پی ایس 6 کشمور سے میر شبیر بجارانی الیکشن سے قبل ہی بلامقابلہ منتخب ہوچکے ہیں۔

علاوہ ازیں کسی بھی نا خوشگوار واقعے سے نمٹنے کے لیے سکیورٹی کے بھی انتہائی سخت انتظامات کیے گئے ہیں۔ پولنگ اسٹیشن کے اندر اور باہر پاک فوج کے جوان تعینات ہوں گے۔ ڈسٹرکٹ اینڈ سیشن ججز ریٹرننگ افسران کی ذمہ داریاں نبھائیں گے جب کہ پاک فوج کے افسران کو مجسٹریٹ کے اختیارات بھی دیے گئے ہیں۔ سیکریٹری الیکشن کمیشن بابر یعقوب نے عوام سے اپیل کی ہے کہ 25 جولائی کو بلا خوف و خطر گھروں سے باہر نکلیں اور اپنا قومی فریضہ ادا کریں۔