این اے 271 بلیدہ میں پاک فوج پر حملہ، 4 جواب شہید، 10 زخمی

راولپنڈی(اُردوپوائنٹ اخبارتازہ ترین۔25 جولائی 2018ء) این اے 271 بلیدہ میں پاک فوج پر حملہ، 4 جواب شہید، 10 زخمی، حملہ گزشتہ شب پاک ایران سرحد کے قریب پیش آیا، واقعہ اس وقت پیش آیا جب انتخابی عملے اور سامان کو پولنگ اسٹیشن منتقل کیا جا رہا تھا۔ پاک فوج کے شعبہ تعلقات عامہ آئی ایس پی آر کی جانب سے فراہم کردہ تفصیلات کے مطابق انتخابات کے دوران دہشت گردی کا ایک اور افسوسناک واقعہ پیش آیا ہے۔

آئی ایس پی آر کے مطابق این اے 271 بلیدہ میں پاک فوج پر دہشت گردوں کی جانب سے حملہ کیا گیا ہے۔ حملہ گزشتہ شب پاک ایران سرحد کے قریب کیا گیا۔ دہشت گردوں کی جانب سے حملہ اس وقت کیا گیا جب پاک فوج کے جوان انتخابی عملے اور سامان کی ترسیل کے عمل میں مصروف تھے۔ حملے کے نتیجے میں پاک فوج کے 4 جوان شہید ہوئے ہیں، جبکہ 10 شدید زخمی بھی ہوئے۔

(جاری ہے)

زخمی فوجی جوانوں کا علاج جاری ہے۔ دوسری جانب بدھ کے روز بلوچستان کے دارالحکومت کوئٹہ میں بھی ایک پولنگ اسٹیشن کے باہر دھماکہ ہوا جس کے نتیجے میں 10 افراد شہید ہوگئے۔ واضح رہے آج ملک بھر کے قومی اور صوبائی حلقوں میں انتخابات 2018ء کیلئے پولنگ کا عمل جاری ہے۔پولنگ کا عمل صبح 8سے بجے سے شروع ہوا اورشام 6بجے تک پولنگ جاری رہے گی۔تاہم گرمی اور حبس کے باوجود لوگ ووٹ ڈالنے کیلئے باہر نکل پڑے ہیں۔

الیکشن عمل کے دوران کوئٹہ میں دہشتگردی کا واقعہ پیش آیا۔اسی طرح لاڑکانہ میں کریکر دھماکہ ہوا۔بعض مقامات پرلڑاجھگڑے کے واقعات ہوئے۔ قومی اسمبلی کے 272 میں سے 270 حلقوں پر جبکہ صوبائی اسمبلیوں کے577 میں سے570 حلقوں پرالیکشن کا عمل جاری ہے۔ قومی اسمبلی کیلئے سبزبیلٹ پیپر اورصوبائی اسمبلی کیلئے سفید بیلٹ پیپرز ہیں۔ الیکشن کمیشن نے بتایا کہ ووٹ ڈالنے کیلئے اصل شناختی کارڈ پولنگ اسٹیشن لےکرجائیں۔ سیکرٹری الیکشن کمیشن کا کہنا ہے کہ الیکشن کمیشن کے پاس120 پارٹیاں رجسٹرڈ ہیں۔ ایک ہزار623 امیدوار آزاد حیثیت سے الیکشن لڑ رہے ہیں۔