این اے 108: پی ٹی آئی امیدوارفرخ حبیب کی جیت برقرار

فرخ حبیب کو1201ووٹوں کی برتری ، ن لیگی رہنماء عابد شیرعلی کے مزید 701ووٹ کم ہوگئے۔ غیرسرکاری نتائج

ثنااللہ ناگرہ جمعرات 2 اگست 2018 16:06

این اے 108: پی ٹی آئی امیدوارفرخ حبیب کی جیت برقرار

فیصل آباد(اُردوپوائنٹ اخبارتازہ ترین۔02اگست 2018ء) : فیصل آباد کے انتخابی حلقے این اے 108میں تحریک انصاف کے رہنماء فرخ حبیب کی جیت برقرار ہے، دوبارہ گنتی کے بعد فرخ حبیب کے مزیدووٹ بڑھ گئے، جبکہ ان کے مدمقابل امیدوار عابد شیرعلی کے مزید 701ووٹ کم ہوگئے۔ میڈیا رپورٹس کے مطابق فیصل آباد کے انتخابی حلقے این اے 108میں مسلم لیگ ن کے امیدوار عابد شیر علی نے الیکشن 2018ء میں ہار پر دوبارہ گنتی کے درخواست دی تھی جس پرحلقے کی دوبارہ گنتی کی گئی توتحریک انصاف کے امیدوار فرخ حبیب دوبارہ کامیاب ہوگئے ہیں۔

این اے 108میں دوبارہ گنتی کے بعد فرخ حبیب کو1201ووٹوں کی برتری حاصل ہے۔فرخ حبیب ایک لاکھ 12ہزار 29ووٹوں سے کامیاب ہوگئے ہیں۔ جبکہ ان کے مدمقابل امیدوار عابد شیر علی کوصرف ایک لاکھ 10ہزار 826ووٹ ملے۔

(جاری ہے)

عابد شیر علی کے دوبارہ گنتی پرمزید 701ووٹ کم ہوگئے۔ دوسری الیکشن کمیشن آف پاکستان نے الیکشن کوصاف شفاف الیکشن قرار دیا ہے۔ دوسری جانب سوموار کوالیکشن کمیشن آف پاکستان کے پاس 58 امیدواروں نے دوبارہ گنتی کیلئے درخواستیں الیکشن کمیشن کے پاس جمع کروائیں۔

الیکشن کمیشن نے 32 درخواستیں مسترد کردیں جبکہ باقی درخواستیں منظورکرتے ہوئے 26 حلقوں میں دوبارہ گنتی کروانے کی اجازت دے دی ہے۔ ان انتخابی حلقوں میں 15 قومی اسمبلی اور 11 صوبائی اسمبلیوں کے حلقے شامل ہیں۔قومی اسمبلی کے حلقوں میں این اے 129 لاہورایاز صادق،این اے 57 راولپنڈی شاہد خاقان عباسی، این اے 15ایبٹ آبادعلی اصغر خان،این اے 10 شانگلہ، این اے 158،این اے 117 بلال ورک،این اے 159ملتان، این اے 110فیصل آباد، این اے 118 ننکانہ صاحب،این اے 140قصور، این اے 170بہاولپور سمیت دیگر حلقے شامل ہیں۔

اسی طرح صوبائی اسمبلیوں کے 11حلقے کھولنے کی اجازت دی گئی ہے۔الیکشن کمیشن نے 37 حلقوں میں دوبارہ گنتی کی درخواست مسترد کردی ہے۔ الیکشن کمیشن نے ان حلقوں کوکھولنے کی اجازت دی جن کا فارم 49 موصول ہوچکا ہے۔