یہ میری منکوحہ ہیں ، ستمبر میں رخصتی ہے سب لوگ دیکھیں گے۔ عامر لیاقت

اسلام آباد (اُردو پوائنٹ تازہ ترین اخبار۔ 06 اگست 2018ء) : این 245 کے لیے پاکستان تحریک انصاف کے رہنما ڈاکٹر عامر لیاقت حسین کی جانب سے جھوٹا بیان حلفی جمع کروانے کے معاملے پر سماعت ہوئی۔ اس کیس پر سماعت الیکشن کمیشن کے ممبر سندھ عبدالغفار سومرو کی سربراہی میں 4 رکنی کمیشن نے کی۔ سماعت کے دوران پاکستان تحریک انصاف کے رہنما ڈاکٹر عامر لیاقت حسین الیکشن کمیشن کے سامنے پیش ہوئے۔

الیکشن کمیشن کے سامنے پیش ہونے پر ڈاکٹر عامر لیاقت حسین نے کہا کہ یہ میری منکوحہ ہیں، اس میں چھُپانے والی کوئی بات نہیں ہے۔ ستمبر میں میری رخصتی ہے اور میر رخصتی پوری دنیا دیکھے گی۔ الیکشن کمیشن نے آج ڈاکٹر عامر لیاقت حسین بیان حلفی جمع کوانے کی ہدایت کرتے ہوئے کیس خارج کر دیا۔ پاکستان تحریک انصاف کے رہنما ڈاکٹر عامر لیاقت حسین نے کراچی کے حلقہ این اے 245 سے کامیابی حاصل کی ۔

(جاری ہے)

ڈاکٹر عامر لیاقت حسین نے این اے 245 سے 56615 ووٹ حاصل کیے جبکہ متحدہ قومی موومنٹ کے رہنما ڈاکٹر فاروق ستار کراچی کے حلقہ این اے 245 سے 35247 ووٹ لے کر دوسرے نمبر پر رہے ۔ گذشتہ سماعت میں الیکشن کمیشن نے کاغذات نامزدگی میں جھوٹا بیان حلفی جمع کروانے سے متعلق کیس میں پاکستان تحریک انصاف کے رہنما ڈاکٹر عامر لیاقت حسین کو دوبارہ نوٹس جاری کیا تھا۔

الیکشن کمیشن میں پی ٹی آئی رہنما عامر لیاقت حسین کی جانب سے کاغذات نامزدگی میں جھوٹا بیان حلفی جمع کروانے سےمتعلق معاملے پرچیف الیکشن کمشنر کی سربراہی میں پانچ رکنی کمیشن نے سماعت کی۔ سماعت کے دوران فریقین کی جانب سے کوئی بھی الیکشن کمیشن میں پیش نہ ہو سکا۔ الیکشن کمیشن نے درخواست گزار مرزا فیصل منظور اور پی ٹی آئی رہنما عامر لیاقت حسین کو دوبارہ نوٹسز جاری کر تے ہوئے کیس کی مزید سماعت کو چھ اگست تک ملتوی کر دیا تھا۔