اسلاف نے کشمیر کی آزادی کے لیے گرانقدر خدمات سرانجام دی ہیں‘شاہ غلام قادر

اسلاف نے ریاست جموں و کشمیر کی آزادی اور پوری ریاست کا پاکستان کے ساتھ الحاق کا فیصلہ 19جولائی1947ء کو کیا تھا

جمعرات 18 جولائی 2019 12:28

مظفرآباد(اُردو پوائنٹ اخبارتازہ ترین - این این آئی۔ 18 جولائی2019ء) آزاد کشمیر قانون ساز اسمبلی کے سپیکر شاہ غلام قادر نے یوم الحاق پاکستان کے حوالے سے کہا ہے کہ اسلاف نے کشمیر کی آزادی کے لیے گرانقدر خدمات سرانجام دی ہیں۔ قائد کشمیر چوہدری غلام عباس نے الحاق پاکستان کا تاریخی فیصلہ اُس وقت کیا جبکہ پاکستان کا قیام ابھی نہیں ہوا تھا۔

(جاری ہے)

اس تاریخی فیصلہ کے تناظر میں اسلاف نے ریاست جموں و کشمیر کی آزادی اور پوری ریاست کا پاکستان کے ساتھ جو الحاق کا فیصلہ 19جولائی1947ء کو کیا تھا آج بھی ریاست جموں و کشمیر کے عوام الحاق پاکستان کے نظریے کے داعی ہیں اور اُن کا بھرپور مطالبہ اقوام متحدہ اور عالمی طاقتوں سے ہے کہ وہ اقوام متحدہ کی تسلیم شُدہ قراردادوں کے مطابق حق خودارادیت دلانے کے لیے مقبوضہ کشمیر میں رائے شماری کروائیں تاکہ کشمیری عوام اپنی اُمنگوں و سوچوں کے مطابق حق آزادی حاصل کر سکیں۔

سپیکر آزاد کشمیر اسمبلی نے شہدائے کشمیر کو خراج عقیدت پیش کرتے ہوئے ریاست جموں و کشمیر کے عوام کو یقین دلایا کہ کسی مرحلے پر بھی حق خودارادیت کے حق سے ریاست جموں و کشمیر کے عوام کو محروم نہیں رکھا جا سکتا۔ جلد آزادی کا سورج طلوع ہو گا اور تکمیل پاکستان کا ادھورا خواب پورا ہو سکے گا۔