بنگلہ دیشی کھلاڑی پاکستان آنے کیلئے تیار ہیں،وہاب ریاض کا انکشاف

بنگلہ دیش پریمیر لیگ میں شرکت کے دوران جن کرکٹرز سے بھی بات ہوئی وہ پاکستان جانے پر رضامند نظر آئے:فاسٹ باﺅلر

Zeeshan Mehtab ذیشان مہتاب ہفتہ جنوری 15:55

بنگلہ دیشی کھلاڑی پاکستان آنے کیلئے تیار ہیں،وہاب ریاض کا انکشاف
ڈھاکہ(اردو پوائنٹ تازہ ترین اخبار۔ 11جنوری 2020ء) پاکستان کرکٹ ٹیم کے فاسٹ باﺅلر وہاب ریاض نے انکشاف کیا ہے کہ بنگلہ دیش پریمیر لیگ (بی پی ایل) میں شرکت کے دوران جن کرکٹرز سے بھی بات ہوئی وہ پاکستان جانے پر رضامند نظر آئے۔تفصیلات کے مطابق بنگلہ دیش کرکٹ بورڈ (بی سی بی) دورہ پاکستان کے حوالے سے مسلسل ٹال مٹول کر رہا ہے اور ایک مرتبہ پھر حتمی فیصلے کیلئے ایک ہفتے کا وقت مانگ لیا گیا ہے۔

ایسے میں بنگلہ دیش پریمیئر لیگ میں شریک قومی کرکٹرز بھی بنگلہ دیش کرکٹرز کو بے جا خوف کے حصار سے نکالنے کی کوششوں میں مصروف ہیں۔پاکستان سپر لیگ (پی ایس ایل) فرنچائز پشاور زلمی کی لاہور میں منعقدہ تقریب کے دوران میڈیا سے گفتگو کرتے ہوئے34سالہ وہاب ریاض نے کہا کہ بی پی ایل میں شرکت کے دوران جن بنگلہ دیشی کرکٹرز سے بات ہوئی، وہ سب پاکستان کا دورہ کرنے پر رضامند نظر آئے، اب معلوم نہیں کہ سیریز کے بارے میں حتمی فیصلہ تاخیر کا شکار کیوں ہے۔

(جاری ہے)

یہاں یہ امر قابل ذکر ہے کہ بی سی بی کی جانب سے یہ موقف بھی اپنایا جا رہا ہے کہ بہت سے کھلاڑی طویل دورے کیلئے پاکستان جانے پر تیار نہیں تاہم ٹی 20 اور ٹیسٹ کرکٹ سے ریٹائرمنٹ لینے والے 36سالہ سابق بنگلہ دیشی کپتان مشرفی مرتضیٰ کا کہنا ہے کہ اگر وہ سکواڈ کا حصہ ہوتے تو پاکستان ضرور جاتے۔