کشمیری نوجوان بھارتی تسلط سے آزادی کیلئے اپنی جانوں کا نذرانہ پیش کر رہے ہیں، پیپلز لیگ

منگل جنوری 20:15

سری نگر۔ (اُردو پوائنٹ اخبارتازہ ترین - اے پی پی۔ 14 جنوری2020ء) مقبوضہ کشمیر میںجموں و کشمیر پیپلز لیگ نے کہا ہے کہ کشمیری نوجوان بھارت کے غیر قانونی تسلط سے آزادی کیلئے اپنی جانوں کا نذرانہ پیش کر رہے ہیں ۔ کشمیر میڈیا سروس کے مطابق پیپلز لیگ کے رہنماء نثار احمد نے ترال میں ایک اجتماع سے خطاب کرتے ہوئے علاقے میںاتوارکو بھارتی فوجیوں کے ہاتھوں ترال میںشہید ہونیوالے تین کشمیری نوجوانوںکو خراج عقیدت پیش کرتے ہوئے کہاکہ کشمیری عوام اپنے شہداء کے مشن کو ہر قیمت پر اسکے منطقی انجام تک جاری رکھیں گے ۔

انہوںنے کہاکہ گزشتہ تین دہائیوں سے کشمیری عوام نے اپنی خون سے سینچی ہوئی جدوجہدآزادی کیلئے عظیم قربانیاں پیش کی ہیں ۔ تاہم انہوںنے کہاکہ بھارت نے ایک فوجی طاقت کے بل پر ہزاروں بے گناہ کشمیریوں کو شہید کیا ہے ۔

(جاری ہے)

نثار احمد نے جدوجہد آزادی کشمیر کے ساتھ کشمیریوں کی بھرپور وابستگی کا خیرمقدم کرتے ہوئے کہاکہ کشمیری کبھی بھی شہداء کی قربانیوں کو رائیگاںنہیں جانے دیں گے اور ان کے مشن کو منطقی انجام تک جاری رکھا جائیگا، انہوںنے کہاکہ کشمیری شہداء کی قربانیاں تحریک آزادی کا بیش قیمت اثاثہ ہیں۔

ادھر جموںوکشمیر ینگز مینز لیگ کے نائب چیئرمین زاہد اشرف نے اسلام آباد میں جاری ایک بیان میں آزاد کشمیر کے بارے میں بھارتی آرمی چیف کے انتہائی غیر ذمہ دارانہ اور اشتعال انگیز بیان کی شدید مذمت کرتے ہوئے کہاہے کہ یہ بھارت کے جنگی جنون اور فسطائی ذہنیت کا واضح ثبوت ہے ۔ انہوںنے بھارت کے جنگی جنون نے پورے جنوبی ایشیا ء کے خطے کو جنگ کے دہانے پر لا کھڑا کیا ہے ۔

انہوںنے کہاکہ پاکستان کبھی بھی کشمیر کے بارے میں اپنے اصولی اور تاریخی موقف پرکوئی سمجھوتہ نہیں کریگا اور نہ ہی کشمیریوں کو انکی منصفانہ جدوجہد آزادی میں تنہا چھوڑے گا ۔ انہوںنے بھارتی حکومت پر زوردیا کہ وہ سچ کو تسلیم کرتے ہوئے اس بات کا ادراک کرے کہ ذعفرانی دہشت گردی کے ذریعے کشمیریوںکی جدوجہد آزادی کو کمزور نہیں کیا جاسکتا ۔ زاہد اشرف نے کولگام میں تین نہتے کشمیریوں کے قتل کی شدید مذمت کرتے ہوئے عالمی برداری پر زوردیا کہ وہ مقبوضہ کشمیرمیں مظلوم انسانیت سے متعلق اپنی ذمہ داری پوری کرے۔