وزیر مملکت برائے سیفران شہریار خان آفریدی کی دوحہ سینٹرل جیل میں پاکستانی قیدیوں سے ملاقات

بیرون ملک پاکستانیوں کے مسائل حل کرنا ہماری اولین ترجیحات میں شامل ہیں،سمندپار پاکستانی بھی دوست ممالک کے قوانین کا احترام کریں اور پاکستان کے سفیر بن کر امن، دوستی اور بھائی چارے کا مظاہرہ کرکے دنیا بھر میں پاکستان کی درست عکاسی کریں، شہریارآفریدی

ہفتہ 18 جنوری 2020 23:10

وزیر مملکت برائے سیفران شہریار خان آفریدی کی دوحہ سینٹرل جیل میں پاکستانی ..

اسلام آباد ۔ (اُردو پوائنٹ اخبارتازہ ترین - اے پی پی۔ 18 جنوری2020ء) وزیر مملکت برائے سیفران وانسداد منشیات شہریار خان آفریدی نے کہا ہے کہ بیرون ملک پاکستانیوں کے مسائل حل کرنا ہماری اولین ترجیحات میں شامل ہیں،سمندپار پاکستانی بھی دوست ممالک کے قوانین کا احترام کریں اور پاکستان کے سفیر بن کر امن، دوستی اور بھائی چارے کا مظاہرہ کرکے دنیا بھر میں پاکستان کی درست عکاسی کریں۔

ان خیالات کا اظہار انہوں نے دوحہ سینٹرل جیل میں قید پاکستانیوں سے ملاقات کے دوران کیا۔وزیر مملکت دوحہ سینٹرل جیل میں قید پاکستانیوں سے ملاقات کے لئے جیل کے اندر قیدیوں کے سیل میں پہنچ گئے، یہ پاکستان کی تاریخ کا پہلا موقع ہے کہ کسی پاکستانی وزیر نے خلیجی ریاست میں جیل کے اندر سیل کا دورہ کیا ہو۔

(جاری ہے)

شہریار خان آفریدی کو اپنے درمیان دیکھ کر پاکستانی قیدی آبدیدہ ہوگئے۔

اس موقع پر قیدیوں نے پاکستان زندہ باد عمران خان زندہ باد شہریار آفریدی زندہ باد کے نعرے لگائے۔قیدیوں نے وزیر مملکت برائے انسداد منشیات سے گفتگو کرتے ہوئے کہا کہ پہلی بار کسی پاکستانی وزیر نے ہماری داد رسی کی اور جیل میں خود ملنے آئے، ہمارا اعتماد نئی قیادت اور وزیراعظم عمران خان اور انکے نیا پاکستان ویژن پر مزید بڑھ گیا ہے، شہریار آفریدی نے جیل میں قید پاکستانیوں کے ساتھ کھانا بھی کھایا۔

اس موقع پرشہریار آفریدی نے کہا کہ بیرون ملک پاکستانیوں کے مسائل ہمارے ترجیحات میں شامل ہیں،آپ لوگوں کے لئے وزیر اعظم عمران خان اور مشیر برائے سمندر پار پاکستانیوں زلفی بخاری کا پیغام لایا ہوں،سمندر پار پاکستانیوں کے مسائل کے حل کیلئے آخری حد تک جائیں گے اور سبز پاسپورٹ کی حرمت بحال کرینگے۔ شہریار خان آفریدی نے کہا کہ سمندپار پاکستانی بھی دوست ممالک کے قوانین کا احترام کریں اور پاکستان کے سفیر بن کر امن، دوستی اور بھائی چارے کا مظاہرہ کرکے دنیا بھر میں پاکستان کی درست عکاسی کریں۔

دوحہ میںشہریار آفریدی نے میجر جنرل سعد بن جاسم ال خولیفی ڈائریکٹر جنرل پبلک سکیورٹی سے ملاقات کی۔ملاقات کے دوران قطر میں قید پاکستانیوں کے مسائل کے حوالے سے تبادلہ خیال کیا۔ اس موقع پر جاسم الخولیفی نے ہر ممکن مدد و تعاون کی یقین دہانی کرائی۔