سردی کم نہیں ہوگی بلکہ مزید بڑھ جائے گی، افغانستان سے مغربی ہواوں کا سلسلہ لاہور سمیت پنجاب کے مختلف اضلاع میں داخل ہوچکا

دھند چھائے رہنے اور سردی کی شدت میں اضافے کے ساتھ ساتھ درجہ حرارت میں کمی واقع ہونے اور بارش کا سلسلہ جاری رہنے کی پیش گوئی

منگل 28 جنوری 2020 23:28

لاہور (اُردو پوائنٹ اخبارتازہ ترین۔ 28 جنوری2020ء) سردی کم نہیں ہوگی بلکہ مزید بڑھ جائے گی، افغانستان سے مغربی ہواوں کا سلسلہ لاہور سمیت پنجاب کے مختلف اضلاع میں داخل ہوچکا، دھند چھائے رہنے اور سردی کی شدت میں اضافے کے ساتھ ساتھ درجہ حرارت میں کمی واقع ہونے اور بارش کا سلسلہ جاری رہنے کی پیش گوئی۔ تفصیلات کے مطابق محکمہ موسمیات نے آئندہ 24 گھنٹوں کے دوران لاہور سمیت پنجاب کے مختلف اضلاع میں وقفہ وقفہ سے بارش جاری رہنے کے علاوہ صبح اور شام کے وقت دھند چھائے رہنے اور سردی کی شدت میں اضافے کے ساتھ ساتھ درجہ حرارت میں بھی کمی واقع ہونے کی پیش گوئی کی ہے۔

محکمہ موسمیات کے مطابق افغانستان سے مغربی ہواوں کا لاہور سمیت پنجاب کے مختلف اضلاع میں داخل ہونیوالا سلسلہ آئندہ مزید 24 گھنٹے برقرار رہے گا۔

(جاری ہے)

جس کے باعث بارش کا سلسلہ بھی جوں کا توں جاری رہے گا۔ شہر میں گزشتہ روز ہونیوالی 14 ملی میٹر بارش ریکارڈ کی گئی اور شہر کی کم سے کم درجہ حرارت 17 ڈگری سینٹی گریڈ اور زیادہ سے زیادہ 197 ڈگری سینٹی گریڈ ریکارڈ کیا گیا۔

جبکہ بروز بدھ اور جمعرات شہر کا کم سے کم درجہ حرارت 4 سے 5 ڈگری سینٹی گریڈ رہنے کے ساتھ ساتھ سردی کی شدت میں بھی اضافے کا رہنے کا امکان ہے۔ محکمہ موسمیات کی جانب سے مزید بتایا گیا ہے کہ لاہور کے علاوہ آئندہ 24 گھنٹوں کے دوران شمال مشرقی پنجاب، اسلام آباد، بالائی خیبر پختونخوا، کشمیر اور گلگت بلتستان میں وقفہ وقفہ سے بارش اور پہاڑوں پر برف باری کی توقع ہے جبکہ ملک کے دیگر علاقوں میں موسم سرد اور خشک رہے گا۔

ملک میں سردی کی شدید لہر برقرار ہے اور منگل کو ریکارڈ کیے گئے کم سے کم درجہ حرارت کی رپورٹ کے مطابق سکردو میں درجہ حرارت منفی18 ڈگری سینٹی گریڈ، بگروٹ، پارا چنار منفی 11، گو پس، کالام، استور منفی 10، مالم جبہ منفی 4، گلگت اور قلات میں منفی 3 ڈگری سینٹی گریڈ ریکارڈ کیا گیا ہے۔