آرمی چیف سے زلمے خلیل زاد اور اقوام متحدہ کے سیکرٹری کی ملاقاتیں

باہمی دلچسپی کے امور اور خطے کی صورتحال پر تبادلہ خیال کیا گیا. آئی ایس پی آر

Mian Nadeem میاں محمد ندیم پیر 17 فروری 2020 21:43

آرمی چیف سے زلمے خلیل زاد اور اقوام متحدہ کے سیکرٹری کی ملاقاتیں

راولپنڈی(اردوپوائنٹ اخبارتازہ ترین-انٹرنیشنل پریس ایجنسی۔17 فروری۔2020ء) آرمی چیف جنرل قمر جاوید باجوہ سے امریکی نمائندہ خصوصی زلمے خلیل زاد نے ملاقات کی جس میں باہمی دلچسپی کے امور پر تبادلہ خیال کیا گیا. پاک فوج کے شعبہ تعلقات عامہ (آئی ایس پی آر) کے مطابق امریکا کے افغان مفاہمتی عمل کے لیے خصوصی نمائندے زلمے خلیل زاد نے جی ایچ کیو کا دورہ کیا اور آرمی چیف جنرل قمر جاوید باجوہ سے ملاقات کی.

آئی ایس پی آر کے مطابق ملاقات میں باہمی دلچسپی کے امور اور خطے میں سیکیورٹی کی صورت حال پر تبادلہ خیال کیا گیا ‘ملاقات میں افغانستان میں مفاہمتی عمل پر بھی تفصیلی تبادلہ خیال کیا گیا.قبل ازیں مہاجرین سے متعلق کانفرنس میں زلمے خلیل زاد کا کہنا تھا کہ افغانستان کو اندرونی مسائل کا سامنا ہے افغان امن عمل میں پیشرفت کے لیے پر امید ہیں باہمی برداشت، سوچ میں تبدیلی اور مفاہمت کی ضرورت ہے.

قبل ازیں آرمی چیف جنرل قمر جاوید باجوہ سے اقوام متحدہ کے سیکرٹری جنرل انتونیوگوتریس سے ملاقات کی آئی ایس پی آر کے مطابق پاک فوج کے سربراہ جنرل قمر جاوید باجوہ سے اقوام متحدہ کے سیکرٹری جنرل انتونیوگوتریس نے جی ایچ کیو میں ملاقات کی۔

(جاری ہے)

ملاقات میں علاقائی سیکورٹی، مسئلہ کشمیر، افغانستان میں مفاہمتی عمل اور باہمی دلچسپی کے امور پر بات چیت کی گئی.اس موقع پر انتونیوگوتریس نے کہا کہ مسئلہ کشمیر کے حل کے لیے اقوام متحدہ کی قراردادوں پر عمل ہونا چاہیے انہوں نے کہا کہ انسداد دہشت گردی، امن مشن میں پاکستان کا کردار قابل تعریف ہے.

آرمی چیف جنرل قمر جاوید باجوہ نے کہا کہ مستحکم اور پرامن پاکستان کے لیے پرعزم ہیں اقوام متحدہ کے سیکرٹری جنرل نے کہا کہ یو این فوجی مبصرگروپ کو کشمیرمیں رسائی دینے پر شکرگزار ہیں، خطے میں امن واستحکام کے لیے پاکستان کی کوششیں قابل تقلید ہیں. اس سے قبل انتونیوگوتریس نے تقریب سے خطاب کرتے ہوئے کہا تھا کہ پاکستانی دستوں نے دوسروں کے لیے اپنی جانوں کا نذرانہ پیش کیا، پاکستان کے دستے امن کے لیے بہترین کام کر رہے ہیں.