جنوبی پنجاب میں کورونا وائرس پھیلنے کا خطرہ شدت اختیار کرگیا

جنوبی پنجاب میں نشتر ہسپتال سمیت کسی ہسپتال میں کورونا وائرس ٹیسٹ کی سہولت موجود نہیں ہے

عثمان خادم کمبوہ منگل 17 مارچ 2020 18:46

بہالپور (اردوپوائنٹ تازہ ترین اخبار-17مارچ2020ء) جنوبی پنجاب میں کورونا وائرس پھیلنے کا خطرہ شدت اختیار کرگیا۔ جنوبی پنجاب میں نشتر ہسپتال سمیت کسی ہسپتال میں کورونا وائرس ٹیسٹ کی سہولت موجود نہیں ہے۔ تفصیلات کے مطابق اس وقت ملک میں کورونا وائرس بہت تیزی سے پھیل رہا ہے تاہم ابھی تک رجسٹر ہوئے تقریباََ تمام کیسز بیرونِ ملک سے آئے ہیں۔ اس وقت ملک میں رجسٹر کیسز کی تعداد 212ہے جن میں 8مریض پنجاب میں ہیں۔

انتظامیہ کے مطابق پنجاب کے زائرین کے واپس آنے کے بعد یہ تعداد بڑھ جائے گی لیکن اس وقت بڑے شہروں کے علاوہ کہیں بھی کورونا ٹیسٹ کی سہولت موجود نہیں ہے۔ خاص طور پہ جنوبی پنجاب میں کورونا کا ٹیسٹ کرنے کی کوئی سہولت موجود نہیں ہے۔ جنوبی پنجاب کے سب سے بڑے نشتر ہسپتال میں بھی ٹیسٹ کٹس موجود نہیں ہیں جس کی وجہ سے مریضوں کی شناخت نہیں ہوسکے گی اور ان مریضوں سے وائرس آگے پھیل سکتا ہے۔

(جاری ہے)

دوسری جانب پنجاب میں کرونا وائرس ایمرجنسی سے نمٹنے کے لئے وینٹی لیٹر کم ہونے کا انکشاف ہوا ہے جس کے بعد صوبائی حکومت کے انتظامات پر سوال اٹھائے جا رہے ہیں۔تفصیلات کے مطابق پنجاب کے 10 کروڑ افراد کے لئے صرف 882 وینٹی لیٹر موجود ہیں جس کا مطلب ہے کہ 1 لاکھ 13 ہزار افراد کے لئے صرف ایک وینٹی لیٹر موجود ہے۔ لاہور کے 6 بڑے ہسپتالوں میں صرف 406 وینٹی لیٹر موجود ہیں۔

یاد رہے کہ گزشتہ روز وزیراعلیٰ پنجاب عثمان بزدار کا کہنا تھا کہ صوبہ پنجاب میں پبلک ہیلتھ ایمرجنسی کی منظوری دے د ی گئی ہے جس کے بعدایک ہفتے میں ایک لاکھ لوگوں کے لئے طبی سہولیا ت فراہم کی جائیں گی۔لیکن پنجاب میں کرونا وائرس کی ایمرجنسی کے لئے وینٹی لیٹرز کی شدیدقلت کی خبر نے وزیراعلیٰ پنجاب عثمان بزدار پر پریشر بڑھا دیا ہے۔پاکستان میں ہر گزرتے دن کے ساتھ کرونا وائرس کے مریضون کی تعداد میں ا ضافہ ہوتا جا رہا ہے۔