پی ٹی وی و پارلیمنٹ حملہ کیس،وزیراعظم کی اپنے وکیل بابر اعوان کو تبدیل کرنے کی درخواست

عدالت نے ملزمان کی وکیل تبدیل کرنے کیلئے مہلت کی استدعا منظور کرلی ، کیس کی سماعت 29 جون تک ملتوی کر دی

پیر 1 جون 2020 23:17

پی ٹی وی و پارلیمنٹ حملہ کیس،وزیراعظم کی اپنے وکیل بابر اعوان کو تبدیل ..

اسلام آباد(اُردو پوائنٹ اخبارتازہ ترین - این این آئی۔ 01 جون2020ء) انسداد دہشت گردی کی عدالت میں جاری پاکستان ٹیلی وژن (پی ٹی وی) اور پارلیمنٹ حملہ کیس میں وزیراعظم عمران خان نے اپنے وکیل بابر اعوان کو تبدیل کرنے کی درخواست جمع کرادی۔اسلام آباد کی انسداد دہشت گردی کی عدالت میں پی ٹی وی اور پارلیمنٹ حملہ کیس کی سماعت ہوئی۔عمران خان کے وکیل بابر اعوان کی جگہ ان کے معاون عدالت میں پیش ہوئے اور سماعت کے دوران وزیراعظم عمران خان کی جانب سے اپنے وکیل بابر اعوان کو تبدیل کرنے کی درخواست دی گئی۔

درخواست میں معاون وکیل نے استدعا کی کہ بابر اعوان وزیراعظم عمران خان کے مشیر تعینات ہوچکے ہیں لہٰذا نیا وکیل مقرر کرنے کیلئے وقت دیا جائے۔عدالت نے ملزمان کی وکیل تبدیل کرنے کیلئے مہلت کی استدعا منظور کرلی اور کیس کی سماعت 29 جون تک ملتوی کر دی۔

(جاری ہے)

خیال رہے کہ گزشتہ دنوں ہی بابر اعوان کو وزیراعظم عمران خان نے مشیر برائے پارلیمانی امور مقرر کیا ہے جن کا عہدہ وفاقی وزیر کے برابر ہے۔

یاد رہے کہ مسلم لیگ (ن) کی گزشتہ حکومت کے خلاف 2014 میں پاکستان تحریک انصاف اور پاکستان عوامی تحریک کی جانب سے اسلام آباد میں دیے گئے 126 روزہ دھرنے کے دوران ہنگامہ ہوا اور کارکنان نے پی ٹی وی اور پارلیمنٹ پر دھاوا بھی بولا تھا۔اس موقع پر ریڈزون میں ہنگامہ آرائی پر مقدمہ درج کیا گیا جس میں موجودہ وزیراعظم عمران خان، صدر مملکت عارف علوی، وزیر منصوبہ بندی اسد عمر، وزیر خارجہ شاہ محمود قریشی اور دیگر نامزد ہیں۔صدر مملکت کو ان کیسز میں صدارتی استثنیٰ حاصل ہے جبکہ وزیراعظم کی جانب سے بابر اعوان عدالت میں پیش ہوتے رہے ہیں۔