مقبوضہ کشمیر، کورونا سے مرنے والوں کی تعداد 100 پہنچ گئی

سرینگر (اُردو پوائنٹ اخبارتازہ ترین - آن لائن۔ 30 جون2020ء) مقبوضہ جموں و کشمیر میں منگل کورونا وائرس میں مبتلا 4 مریضوں کی موت ہوئی ہے اور اس طرح سے کورونا سے مرنے والوں کی تعداد 100 تک پہنچ گئی ہے۔ساوتھ ایشین وائر کے مطابق سرینگر کے باغات برزلہ سے تعلق رکھنے والے 55 سالہ ایک شخص اور شوپیاں سے تعلق رکھنے والے 23 سالہ ایک نوجوان کی کورونا سے موت ہوئی ہے۔

حکام نے بتایا کہ سرینگر کے سی ڈی ہسپتال میں ان دونوں کی موت ہوئی ہے۔اس سے قبل سرینگر کے جے وی سی ہسپتال میں ضلع بارہمولہ سے تعلق رکھنے والا 52 سالہ ایک شخص کی کورونا سے موت ہوئی تھی۔ساوتھ ایشین وائر کے مطابق حکام نے بتایا کہ بارہمولہ سے تعلق رکھنے والے ایک شخص کا کورونا ٹیسٹ پازیٹیو پانے کے بعد انہیں 27 جون کو سرینگر کے جے وی سی ہسپتال داخل کریا گیا تھا۔

(جاری ہے)

انہوں نے بتایا کہ یہ شخص نمونیا کا مریض تھا اور انہیں آئی سی یو میں رکھا گیا تھا، تاہم حرکت قلب بند ہونے سے ان کی موت ہوئی ہے۔ساوتھ ایشین وائر کے مطابق ضلع کٹھوعہ سے تعلق رکھنے والی کورونا متاثرہ ایک معمر خاتون کی منگل کی صبح موت ہوئی تھی۔ یہ ضلع کٹھوعہ میں کورونا سے متعلق پہلی موت ہے۔گورنمنٹ میڈیکل کالج جموں کے پرنسپل ڈاکٹر نصیب چند ڈیگرا نے بتایا کہ کٹھوعہ سے تعلق رکھنے والی عمر رسیدہ خاتون کو یہاں 25 جون کو لایا گیا تھا اور وہ مسلسل وینٹی لیٹر پر تھی۔

انہوں نے کہا کہ پھیپھڑوں کے عارضے میں مبتلا یہ خاتون منگل کی صبح قریب ساڑھے سات بجے انتقال کر گئی۔ان چار اموات کے ساتھ جموں و کشمیر میں اب تک کورونا سے متعلق اموات کی تعداد بڑھ کر 100 ہوگئی ہے جن میں سے 88 کا تعلق کشمیر سے ہے جبکہ 12 جموں سے تعلق رکھتے ہیں۔وادی کشمیر میں ضلع سرینگر میں اب تک کورونا سے سب سے زیادہ 23 اموات ہوئی ہیں اور دوسرے نمبر پر ضلع بارہمولہ ہے جہاں اب تک 16 افراد کی اس وائرس میں مبتلا ہو کر موت واقع ہوئی ہے۔ضلع کولگام میں تیرہ، شوپیاں میں 12، بڈگام میں سات، اننت ناگ میں سات، کپوارہ میں پانچ، پلوامہ میں چار اور بانڈی پورہ میں ایک مریض کورونا میں مبتلا ہوکر داعی اجل کو لبیک کہہ گیا ہے۔