آرمینیا سے جنگ، آذربائیجان میں پاکستانی جھنڈوں کی طلب میں اضافہ

آرمینیا کے خلاف جنگ میں پاکستان نے اپنا وزن آذربائیجان کے پلڑے میں ڈال کر آذری قوم کے دل جیت لیے ہیں اور اب وہاں پاکستانی پرچموں کی طلب بھی بڑھ گئی ہے، آذری سفیر کی ٹوئٹ

شہریار عباسی پیر 19 اکتوبر 2020 20:38

آرمینیا سے جنگ، آذربائیجان میں پاکستانی جھنڈوں کی طلب میں اضافہ

باکو(اردوپوائنٹ اخبارتازہ ترین۔19 اکتوبر2020ء) آذربائیجان اور آرمینیا کے درمیان جاری جنگ کے بعد آذربائیجان میں پاکستانی جھنڈوں کی ڈیمانڈ بڑھ گئی ہے ۔ تفصیلات کے مطابق آرمینیا کے خلاف جنگ میں پاکستان نے اپنا وزن آذربائیجان کے پلڑے میں ڈال کر آذری قوم کے دل جیت لیے ہیں اور اب وہاں پاکستانی پرچموں کی طلب بھی بڑھ گئی ہے ۔ بین الاقوامی ذرائع کے مطابق آذربائیجان اور آرمینیا کے درمیان ناگورنو کاراباخ کے تنازع پر جنگ کئی ہفتوں سے جاری ہے اور عارضی جنگ بندی کے باوجود آرمینیا کی جانب سے شہری آبادی کو نشانہ بنایا جا رہا ہے ۔

پاکستان اور ترکی نے آرمینیا سے جنگ کے معاملے پر آذربائیجان کی پہلے دن سے حمایت کر رکھی ہے جس کے باعث دونوں ملکوں سے اظہار یکجہتی کیلئے باکو کے گھروں کی بالکونیوں میں دونوں ممالک کے پرچم لہرائے گئے تھے ۔

(جاری ہے)

پاکستان کی حمایت کے بعد آذربائیجان میں پاکستانی جھنڈوں کی طلب میں بھی اضافہ ہوگیا ہے جس کی تصدیق پاکستان میں تعینات آذری سفیر علی علی زادہ نے بھی کی ہے ۔

سماجی رابطوں کی ویب سائٹ ٹوئٹر پر شیئر کی گئی ایک ٹوئٹ میں آذری سفیر کا کہنا تھا کہ آذربائیجان میں لوگ ترکی اور پاکستان سے بے حد محبت کرتے ہیں اور اسی وجہ سے پاکستانی جھنڈوں کی طلب بڑھ گئی ہے ۔

Love to #Pakistan & #Turkey is boundless in #Azerbaijan,and requirements for Pakistani flag are also increased.
Internationally recognized territories of Aze🇦🇿are under #ArmenianOccupation almost 30 years.#DontBeSilent #SupportJustice #StopArmenianAggression #PrayForAzerbaijan https://t.co/azpbMUW3xa
— Ali Alizada 🇦🇿 (@Ali_F_Alizada) October 19, 2020

خیال رہے کہ عالمی سطح پر ’نگورنو کارا باخ‘ آذربائیجان کا تسلیم شدہ علاقہ ہے تاہم اس پر آرمینیا کے قبائلی گروہ نے فوج کے ذریعے قبضہ کررکھا ہے جب کہ اسی قبضے کے باعث پاکستان آرمینیا کو تسلیم نہ کرنے والا واحد ملک ہے ۔ دوسری جانب آرمینیا سے جنگ میں آذربائیجان کا پلڑا بھاری ہے اور اب تک ناگورنو کاراباخ کے متعدد علاقوں سے قبضہ چھڑا لیا ہے ۔