ٹی وی اینکر، گاڑیوں کی شوقین اور روایت پسند سانائے تکائچی جاپان کی پہلی خاتون وزیراعظم بن گئیں

منگل 21 اکتوبر 2025 17:10

ٹوکیو (اُردو پوائنٹ اخبارتازہ ترین - اے پی پی۔ 21 اکتوبر2025ء) جاپان کی حکمران جماعت لبرل ڈیموکریٹک پارٹی (ایل ڈی پی) کی سانائے تکائچی ملک کی پہلی خاتون وزیراعظم بن گئیں۔ برطانوی نشریاتی ادارے کی رپورٹ کے مطابق سانائے تکائچی سابق ٹی وی اینکر ہیں اور ماضی میں میوزک بینڈ میں ڈرمز بھی بجاتی رہیں، انہوں نے 1993 میں جاپانی سیاست میں قدم رکھا اور بطور آزاد امیدوار ایوان زیریں کی نشست پر کامیابی حاصل کی،وہ اس جماعت کی پہلی خاتون سربراہ منتخب ہوئی ہیں جو سکینڈلز کی زد میں ہے اور اس وقت ووٹرز کا اعتماد حاصل کرنے کی تگ دو میں ہے۔

رپورٹ کے مطابق سانائے تکائچی 1961 میں نارا پریفیکچر میں پیدا ہوئیں، ان کے والد ایک آفس ورکر اور والدہ پولیس افسر تھیں جبکہ ان کی زندگی میں سیاست کہیں دور دور تک نہیں تھی۔

(جاری ہے)

سانائے تکائچی سکوبا ڈائور اور کاروں کی بھی شوقین رہیں، ان کی پسندیدہ ’’ٹویوٹا سپرا‘‘ اب نارا میوزیم میں نمائش کے لیے رکھی گئی ہے۔سیاست میں آنے سے پہلے سانائے تکائچی نے مختصر عرصے کے لیے ٹی وی میزبان کے طور پر بھی کام کیا۔

انہوں نے 1992 میں اپنے پہلے پارلیمانی الیکشن میں آزاد حیثیت سے حصہ لیا مگر کامیاب نہ ہو سکیں تاہم وہ پرعزم رہیں اور ایک سال بعد آزادانہ حیثیت میں رکن اسمبلی منتخب ہو کر انہوں نے 1996 میں ایل ڈی پی میں شمولیت اختیار کر لی، اس کے بعد سے وہ 10 بار رکن اسمبلی منتخب ہوئی ہیں۔رپورٹ کے مطابق انتخابی سیاست میں انہیں صرف ایک بار شکست ہوئی اور انہوں نے پارٹی کی متحرک قدامت پسند آوازوں میں سے ایک کے طور پر شہرت حاصل کی۔

سانائے تکائچی اس سے پہلے اعلیٰ حکومتی عہدوں پر بھی فائز رہ چکی ہیں جن میں وزیر برائے اقتصادی تحفظ، تجارت و صنعت، داخلہ اور مواصلات شامل ہیں۔سانائے تکائچی نے 2021 میں پہلی بار ایل پی ڈی کی قیادت کی دوڑ میں حصہ لیا لیکن وہ سابق وزیراعظم فومیو کشیدا سے جیت نہ سکیں، وہ 2024 میں دوبارہ دوڑ میں شامل ہوئیں ، اس بار ووٹنگ کے پہلے مرحلے میں وہ سرفہرست رہیں تاہم فائنل مرحلے میں شیگیرو ایشیبا سے ہار گئیں۔انہوں نے اپنی حالیہ مہم میں سکول کے بچوں سے گفتگو کرتے ہوئے کہا کہ میرا مقصد آئرن لیڈی بننا ہے۔وہ متنازع ’’یاسوکونی شرائن‘‘ پر باقاعدگی سے جاتی ہیں، یہ جگہ جاپان کی جنگ میں مرنے والوں بشمول سزا یافتہ جنگی مجرموں کے اعزاز میں تعمیر کی گئی ہے۔