ایرانی عہدیدار کی بیٹی کی شادی کی ویڈیو وائرل، سوشل میڈیا پر طوفان

دلہن نے بغیر آستین اور ڈیپ نیک والا مغربی طرز کا عروسی لباس پہنا ہواتھا،رپورٹ

منگل 21 اکتوبر 2025 17:19

ایرانی عہدیدار کی بیٹی کی شادی کی ویڈیو وائرل، سوشل میڈیا پر طوفان

تہران (اُردو پوائنٹ اخبارتازہ ترین - این این آئی۔ 21 اکتوبر2025ء) ایران کے اعلی دفاعی اور قومی سلامتی کے عہدیدار ریئر ایڈمرل علی شمخانی اپنی بیٹی کی شادی کی ویڈیو لیک ہونے کے بعد شدید تنازع کا شکار ہوگئے۔ایڈمرل شمخانی سپریم لیڈر کے قریبی ساتھی اور طویل عرصے تک سپریم نیشنل سیکیورٹی کونسل کے سیکریٹری رہ چکے ہیں۔ ایران میں خواتین پر سخت اسلامی قوانین نافذ کرنے اور مظاہرین پر کریک ڈائون کے حکم دینے کے لیے مشہور ہیں، تاہم حالیہ لیک ویڈیو میں ان کی اپنی فیملی کو انہی اصولوں کے برعکس دیکھا گیا ہے۔

لیک ویڈیو اپریل میں ریکارڈ کی گئی تھی، جس میں شمخانی کو اپنی بیٹی کو شادی ہال میں لاتے ہوئے دکھایا گیا، دلہن نے بغیر آستین اور ڈیپ نیک والا مغربی طرز کا عروسی لباس پہنا ہوا ہے جبکہ شمخانی کی اہلیہ نیلے رنگ کے ڈیپ نیک گان میں نظر آرہی ہیں۔

(جاری ہے)

اس کے علاوہ ویڈیو میں کئی خواتین بغیر حجاب کے دیکھی جا سکتی ہیں، ویڈیو میں مغربی رسم باپ کا بیٹی کو اسٹیج تک لانا ایرانی روایات سے متصادم دکھائی دیتا ہے۔

ویڈیو وائرل ہونے کے بعد سوشل میڈیا پر سیاسی تجزیہ کاروں اور سابق فوجیوں نے مطالبہ کیا کہ شمخانی تمام عہدوں سے استعفی دیں اور عوام سے معافی مانگیں۔ایک ایرانی صحافی امیر حسین مصلی نے کہا کہ یہ ویڈیو ثابت کرتی ہے کہ حکمران طبقہ خود اپنے بنائے ہوئے قوانین پر یقین نہیں رکھتا، وہ صرف عوام کی زندگی اجیرن بنانا چاہتے ہیں۔واضح رہے کہ ایڈمرل شمخانی 2022 میں خواتین کے احتجاج کے دوران قومی سلامتی کونسل کی سربراہی کر رہے تھے، جب مہسا امینی کی موت کے بعد ملک بھر میں مظاہرے پھوٹ پڑے تھے، اس وقت شمخانی نے سخت لہجے میں کہا تھا کہ اگر مظاہرین واپس نہ گئے تو ہم ان پر حملہ کریں گے۔