نیشنل ہائی ویز اور موٹروے پر شدید دھند کا سلسلہ جاری

اسلام آباد (اُردو پوائنٹ اخبارتازہ ترین - اے پی پی۔ 02 جنوری2021ء) نیشنل ہائی ویز اور موٹروے پر شدید دھند کا سلسلہ جاری، دھند موٹر ویز اور دیگر قومی شاہرات کے دھند سے متاثرہ حصے چند گھنٹے بند اور چند گھنٹے کھلے رہنے لگے، رات گئے ٹھوکر نیاز بیگ سے   اسلام آباد تک موٹر وے بند  کو شدید دھند کے باعث بند کرنا پڑا جسے اب کھول دیا گیا ہے- ترجمان نیشنل ہائی ویز اینڈ موٹر وے پولیس کے مطابق دھند کا سلسلہ دسمبر سے شروع ہو کر فروری تک چلا جاتا ہے تاہم موٹر وے پولیس اس قدرتی طور پر پیش آنے والی صورتحال میں روڈ صارفین کی حفاظت کے لئے تمام تر احتیاطی تدابیر اختیار کرنے اور مسافروں اور ڈرائیور حضرات کو آگاہی کے لئے روایتی اور جدید ٹولز کو بروئے کار لا رہی ہے تاکہ قومی شاہرات اور موثر ویز پر سفر کو محفوظ بنایا جا سکے- ترجمان کے مطابق گزشتہ شب ایم ٹو پر بتدریج دھند کی شدت میں اضافہ ہوا اور رواں سیزن میں پہلی مرتبہ ایم ٹو کو لاہور سے اسلام آباد تک ہر قسم کی ٹریفک کے لئے بند کرنا پڑا، تاہم دیگر قومی شاہرات پر بھی جزوی انتظامات کرکے روڈ صارفین کو رہنمائی فراہم کی جاتی رہی۔

(جاری ہے)

ترجمان نے کہا کہ دھند کی شدت میں کمی آنے کے بعد موٹروے کو ہر قسم کی ٹریفک کے لیے کھول دیا گیا ہے، ترجمان نے عوام سے گزارش ہے کہ غیر ضروری سفر سے گریز کریں، گاڑیوں میں فوگ لائٹس کا استعمال کریں۔ رفتار کم رکھیں اور اگلی گاڑی سے درمیانی فاصلہ معمول سے زیادہ رکھیں۔سفر شروع کرنے سے پہلے سمارٹ فون ایپلی کیشن موٹر وے ہمسفر، ایف ایم ریڈیو 95 یا ہیلپ لائن130 سے معلومات اور رہنمائی ضرور حاصل کر لیں۔