سینیٹ انتخابات میں خفیہ کیمروں کے معاملے کی تحقیقات کے لیے کمیٹی قائم

کمیٹی میں سرفراز بگٹی، طلحہ محمود، ہدایت اللہ، رانا مقبول احمد، محمد اعظم خان سواتی اور سینیٹر ڈاکٹر سکندر مینڈرو کمیٹی میں شامل ہونگے.نوٹیفکیشن جاری

میاں محمد ندیم جمعرات 8 اپریل 2021 14:40

سینیٹ انتخابات میں خفیہ کیمروں کے معاملے کی تحقیقات کے لیے کمیٹی قائم

اسلام آباد(اردوپوائنٹ اخبارتازہ ترین-ا نٹرنیشنل پریس ایجنسی۔08 اپریل ۔2021ء) سینیٹ میں گزشتہ ماہ چیئرمین سینیٹ کے انتخاب سے قبل پولنگ بوتھ میں خفیہ کیمروں کے معاملے کی تحقیقات کا فیصلہ کرلیا گیا ہے اس ضمن میں جاری کردی نوٹیفکیشن میں کہا گیا کہ تحقیقات کے لیے 7 رکنی کمیٹی تشکیل دی گئی ہے. نوٹیفکیشن کے مطابق سرفراز بگٹی، طلحہ محمود، ہدایت اللہ، رانا مقبول احمد، محمد اعظم خان سواتی، ڈاکٹر سکندر مینڈرو کمیٹی میں شامل ہیں علاوہ ازیں کمیٹی میں سابق آفس سیکرٹری ایگزیکٹو ڈائریکٹر (پی آئی پی) محمد انور بھی شامل ہیں کمیٹی ایک ماہ میں تحقیقات مکمل کرنے کی پابند ہوگی.

(جاری ہے)

واضح رہے کہ 12 مارچ کو چیئرمین سینیٹ کے انتخاب سے قبل پولنگ بوتھ میں خفیہ کیمروں کی تنصیب کا تنازع سامنے آیا تھا پاکستان پیپلز پارٹی کے سینیٹر مصطفیٰ نواز کھوکھر اور مسلم لیگ (ن) کے سینیٹر مصدق ملک نے چیئرمین سینیٹ کے انتخاب کے لیے بنائے گئے پولنگ بوتھ میں خفیہ کیمرے نصب ہونے کا انکشاف کیا تھا اور انہوں نے اس کی تصاویر اور ویڈیوز بھی پیش کی تھیں.

اس معاملے پر اراکین سینیٹ کی حلف برداری کے بعد ایوان میں اپوزیشن نے شور شرابا کیا تھا جس پر پریزائیڈنگ افسر نے پولنگ بوتھ تبدیل کرنے کی ہدایت جاری کردی تھی علاوہ ازیں پریزائیڈنگ افسر مظفر حسین شاہ نے پولنگ بوتھ میں خفیہ کیمروں کی تنصیب کے معاملے کی تحقیقات کے لیے کمیٹی تشکیل دینے کی ہدایت جاری کردی تھی. اس ضمن میں مسلم لیگ (ن) کی نائب صدر مریم نواز نے ٹوئٹر پیغام میں 2018 کے عام انتخابات اور ڈسکہ میں ہوئے حالیہ ضمنی انتخاب کا حوالہ دیتے ہوئے کہا تھا کہ آر ٹی ایس اور ڈسکہ دھند کے بعد سینیٹ پر ڈاکا ڈالنے والے آخری جنگ ہار چکے ہیں دوسری جانب پولنگ بوتھ کے کیمروں کے معاملے پر بلاول بھٹو زرداری نے صحافیوں سے بات کرتے ہوئے کہا تھا کہ صادق سنجرانی نے جس طرح ایوان کے عزت و وقار کو مجروح کیا ہے اس پر ان کو مستعفی ہوجانا چاہیے اس کے سوا اور کوئی آپشن نہیں ہے.

علاوہ ازیں حکومتی اراکین نے خفیہ کیمروں کی تنصیب کا الزام الٹا اپوزیشن پر عائد کردیا اور کہا تھا کہ اپوزیشن کی سازش بے نقاب کردی ہے اور جس نے کیمرا لگایا ہے اس نے ہی ڈھونڈا ہے.