عالمی حدت میں اضافہ سیلابوں اور طوفانوں کا سبب، ڈبلیو ایم او

اسلام آباد (اُردو پوائنٹ ۔ UN اردو۔ 19 ستمبر 2025ء) عالمی موسمیاتی ادارے (ڈبلیو ایم او) نے کہا ہے کہ دنیا بھر میں پانی کے ذرائع پر دباؤ بڑھ رہا ہے جبکہ حیات بخش وسائل کو لاحق خطرات سے زندگیاں اور روزگار بری طرح متاثر ہو رہے ہیں جس کا سبب موسمیاتی تبدیلی ہے۔

ادارے کی سیکرٹری جنرل سیلیسٹ ساؤلو کا کہنا ہے کہ رواں سال آبی آفات نے بڑے پیمانے پر تباہی پھیلائی۔

یہ ہنگامی حالات ایسے وقت پیدا ہو رہے ہیں جب فضا تیزی سے گرم ہو رہی ہے جس کے نتیجے میں پانی کی بڑی مقدار بخارات بن جاتی ہے جس سے شدید بارشیں ہوتی ہیں۔

(جاری ہے)

سیلیسٹ ساؤلو نے یہ بات دنیا میں آبی ذرائع، برفباری اور برف کی صورتحال پر 'ڈبلیو ایم او' کی نئی رپورٹ شائع ہونے پر کہی ہے۔

Courtesy of Guillermo Peris Peris

گزشتہ سال نومبر میں سپین کے شہر ویلینشیا میں طوفانی بارشوں اور سیلاب سے ہونے والی تباہی کا ایک منظر۔

یورپ میں سیلاب

گزشتہ سال ستمبر میں وسطی و مشرقی یورپ میں تباہ کن طوفان بورس کے نتیجے میں شدید سیلاب آئے جن کے نتیجے میں ہزاروں لوگوں کو نقل مکانی کرنا پڑی۔ ایسے حودث تواتر سے رونما ہونے کا خدشہ ہے حالانکہ انہیں کبھی کبھار ہی آنا چاہیے۔

'ڈبلیو ایم او' کے ڈائریکٹر سٹیفن یولنبروک نے کہا ہے کہ چیک ریپبلک میں بہت سے دریاؤں میں شدید سیلاب آیا جبکہ سائنسی اندازوں کے مطابق یہ کیفیت تقریباً ہر 100 برس کے بعد دیکھی جانی چاہیے۔

ان کا کہنا ہے کہ بدقسمتی سے اب ایسے موسمی حالات تواتر سے رونما ہونے لگے ہیں جنہیں دہائیوں بعد پیدا ہونا چاہیے۔

آبی چکر کی بے ترتیبی

حالیہ دنوں انڈیا کی ریاست ہماچل پردیش یا جموں و کشمیر کے کچھ حصوں کو متاثر کرنے والی انتہائی شدید بارشیں کرہ ارض کے آبی چکر میں بڑھتی ہوئی بے ترتیبی کی ایک اور مثال ہیں۔

'دبلیو ایم او' کی سائنسی افسر سلگنا مشرا نے کہا ہے کہ اس خطے میں ایسے وقت انتہائی شدید بارشیں ہوئیں جب ان کی توقع نہیں تھی اور مون سون وقت سے پہلے آ گیا۔

'ڈبلیو ایم او' کی رپورٹ میں گزشتہ سال موسمی کیفیت 'ال نینا' کے اثرات کی طرف اشارہ کرتے ہوئے بتایا گیا ہے کہ اس نے ایمازون کی شدید خشک سالی میں اہم کردار ادا کیا۔ شمال مغربی میکسیکو اور شمالی امریکہ کے بعض حصوں میں معمول سے کم بارش ہوئی جبکہ جنوبی اور جنوب مشرقی افریقہ میں بھی یہی کچھ دیکھا گیا۔

سیلیسٹ ساؤلو کا کہنا ہے، سائنسی شواہد یہ ظاہر کرتے ہیں کہ کرہ ارض کی بدلتی ہوئی آب و ہوا اور بڑھتے درجہ حرارت مزید شدید موسمی واقعات کا سبب بن رہے ہیں جن میں خشک سالی اور سیلاب نمایاں ہیں۔

IOM/Gema Cortes

جمیکا میں سمندری طوفان بیرل سے ہونے والی تباہی۔

ساحلی علاقوں کے لیے خطرہ

رپورٹ کے دیگر نتائج اس بات کی تصدیق کرتے ہیں کہ 2024 میں مغربی افریقہ کے وسطی علاقے، جھیل وکٹوریہ، قازقستان اور جنوبی روس، وسطی یورپ، پاکستان اور شمالی انڈیا، جنوبی ایران اور شمال مشرقی چین میں معمول سے زیادہ نمی اور بارش دیکھی گئی۔

یہ رپورٹ بتاتی ہے کہ دنیا کے ایک حصے میں آبی چکر میں آنے والی تبدیلیوں کے اثرات دوسرے حصے پر براہ راست پڑتے ہیں۔

سیلیسٹ ساؤلو نے کہا ہے کہ 2024 مسلسل تیسرا سال تھا جب تمام خطوں میں بڑے پیمانے پر گلیشیئروں کا نقصان ہوا جنہوں نے 450 گیگا ٹن برف کھو دی جو کہ سات کلومیٹر اونچے، سات کلومیٹر چوڑے اور سات کلومیٹر گہرے برفانی بلاک کے برابرہے۔

رپورٹ میں زور دیا گیا ہے کہ ندیوں کے بہاؤ، زیر زمین پانی، مٹی کی نمی اور پانی کے معیار کے بارے میں معلومات کے تبادلے کو بہتر بنانے کی اشد ضرورت ہے۔