وزیراعظم عمران خان نے وفاقی کابینہ کا اجلاس کل طلب کر لیا

قیدیوں کی سزا میں کمی اور سول انتظامیہ کی مدد کے لیے پاک فوج کی تعیناتی کی منظوری دی جائے گی

میاں محمد ندیم پیر 3 مئی 2021 13:41

اسلام آباد(اردوپوائنٹ اخبارتازہ ترین-ا نٹرنیشنل پریس ایجنسی۔ 03 مئی ۔2021ء) وزیراعظم عمران خان نے وفاقی کابینہ کا اجلاس کل طلب کر لیا ہے، اجلاس میں عید الفطر پر قیدیوں کی سزا میں کمی اور سول انتظامیہ کی مدد کے لیے پاک فوج کی تعیناتی کی منظوری دی جائے گی. وزیراعظم عمران خان کی زیر صدارت کل طلب کیے گئے وفاقی کابینہ کے اجلاس کا 8 نکاتی ایجنڈا جاری کردیا گیا ہے جس کے مطابق اجلاس میں کورونا وائرس اور ویکسین کی صورتحال کا جائزہ لیا جائے گا اور کابینہ کو ویکیسین سے متعلق بریفنگ دی جائے گی.

(جاری ہے)

ایجنڈا کے مطابق کابینہ ہیوی انڈسٹری ٹیکسلا میں پروڈکشن کنٹرول ممبر کی تعیناتی کی منظوری دے گی، این ای ڈی انجینئرنگ یونیورسٹی اینڈ ٹیکنالوجی کے 100 سال مکمل ہونے پر اعزازی سکہ جاری کرنے کی منظوری دی جائے گی اس کے علاوہ عیدالفطر کے موقع پر قیدیوں کی سزا میں کمی کی سمری منظوری کے لیے پیش کی جائے گی، جبکہ ریلوے کنسٹرکشن پاکستان لمیٹڈ کے سی ای او کی تعیناتی، ریلوے اور ٹیکس بیریر میں نجی شعبہ کی شمولیت کی منظوری ایجنڈے میں شامل ہے.