قوم بھارت کیخلاف فتح کا جشن منا رہی ہے جبکہ پی ٹی آئی کے درخشندہ ستارے مودی کی زبان بول رہے ہیں

سیاسی جماعتوں پہ آزمائش کے بہت وقت آئے لیکن کبھی ایسا نہیں ہوا کہ کوئی جماعت ملک دشمن ہوجائے، یہ مودی کی محبت میں گرفتار وطن فروشی کر رہے ہیں۔ خواجہ آصف

ثنااللہ ناگرہ جمعرات 7 مئی 2026 21:44

قوم بھارت کیخلاف فتح کا جشن منا رہی ہے جبکہ پی ٹی آئی کے درخشندہ ستارے ..

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی ۔ 07 مئی 2026ء ) وزیر دفاع خواجہ آصف نے کہا ہے کہ قوم بھارت کیخلاف فتح کا جشن منا رہی ہے جبکہ پی ٹی آئی کے درخشندہ ستارے مودی کی زبان بول رہے ہیں۔ ایکس پر اپنے ٹویٹ میں انہوں نے کہا کہ پاکستان کی سیاسی تاریخ میں بہت سیاسی جماعتوں پہ آزمائش کے وقت آئے۔ لیڈر پھانسی لگے کئی بار قید ہوئے جلاوطن ہوئے۔

لیکن کبھی ایسا نہ ہوا کے جماعت ملک دشمن ہو جائے لیڈر اور ورکر پاکستان دشمن ہوجائیں۔ بھارت کے ہمدرد بن جائیں۔ قوم بھارت کے خلاف فتح جشن منا رہی ہے۔ تحرہک انصاف کے درخشندہ ستارے مودی کی زبان بول رہے ہیں ۔ وطن کے شہداء اور غازیوں کے ساتھ یکجہتی سے گریزاں ہیں ۔ وطن کا برا چاہتے ہیں مودی کی محبت میں گرفتار وطن فروشی کر رہے ہیں۔

(جاری ہے)

مزید برآں وفاقی وزیر اطلاعات و نشریات عطاء اللہ تارڑ نے معرکہ حق کی فتح کا ایک سال مکمل ہونے پر قوم کو مبارکباد دیتے ہوئے کہا کہ ’’معرکہ حق ‘‘میں فتح کے بعد آج دنیا پاکستان کو ایک سنجیدہ و مضبوط ملک کے طور پر دیکھ رہی ہے، ’’معرکہ حق ‘‘قومی عزم، جذبے اور وژن کی علامت ہے، بیانیے کی جنگ میں حقائق اور سچ اہمیت رکھتے ہیں، بھارتی حکومت نے سچائی کے خوف سے پاکستانی یوٹیوب چینلز پر پابندیاں عائد کیں، ہم نے انڈین چینلز پر پابندی کی بجائے اپنی ڈیجیٹل حکمت عملی تبدیل کی، ہماری ٹیم نے بھارتی لوکیشنز کو جیو ٹیگ کر کے وہاں کے صارفین تک پاکستانی ملی نغمے، ترانے اور جے ایف 17 تھنڈرز کی ویڈیوز پہنچائیں جس کے نتیجے میں بھارتی عوام خود اپنی حکومت سے سوال کرنے پر مجبور ہو گئے۔

’’معرکہ حق ‘‘میں جامع حکمت عملی اور مکمل ہم آہنگی کے ساتھ ہر سطح پر دشمن کو بھرپور جواب دیا گیا۔ ان خیالات کا اظہار انہوں نے جمعرات کو یہاں سینٹر آف پاکستان اینڈ انٹرنیشنل ریلیشنز کے زیر اہتمام ”معرکہ حق سیمینار“ سے خطاب کرتے ہوئے کیا۔ وفاقی وزیر اطلاعات نے کہا کہ پہلگام واقعہ کے بعد پاکستانی اور بین الاقوامی صحافیوں کے ایک وفد کو بیلا نور شاہ کے اس علاقے کا دورہ کرایا گیا جس کے بارے میں بھارت نے دعویٰ کیا تھا کہ وہاں دہشت گردوں کے کیمپ موجود ہیں، ہم صحافیوں کے وفد کو عین اسی مقام پر لے گئے تاکہ دنیا کو دکھایا جا سکے کہ وہاں معمولات زندگی مکمل طور پر معمول کے مطابق ہیں، اس دورے کے ذریعے بھارتی پروپیگنڈے کو بے نقاب کیا گیا۔