نذیر چوہان 2روزہ جسمانی ریمانڈ پر ایف آئی اے کے حوالے

لاہور(اُردو پوائنٹ اخبارتازہ ترین - این این آئی۔ 29 جولائی2021ء) مقامی عدالت نے جہانگیر ترین گروپ کے رکن پنجاب اسمبلی نذیر چوہان کو 2 روزہ جسمانی ریمانڈ پر ایف آئی اے کے حوالے کردیا،نذیر چوہان کے خلاف کار سرکار میں مداخلت، جان سے مارنے کی دھمکیوں سمیت دیگر دفعات کے تحت تیسرا مقدمہ بھی درج کرلیاگیا ۔ایف آئی اے کی خصوصی ٹیم کی جانب سے جہانگیر ترین گروپ کے رکن پنجاب اسمبلی نذیر چوہان کوجسمانی ریمانڈ کیلئے ضلع کچہری میں پیش کیا گیا۔

جوڈیشل مجسٹریٹ یوسف عبدالرحمان نے جسمانی ریمانڈکی سماعت کی۔دوران سماعت ایف آئی اے نے نذیر چوہان کے جسمانی ریمانڈ کی استدعا کی جسے عدالت نے منظور کرتے ہوئے نذیر چوہان کو 2 روزہ جسمانی ریمانڈ پر ایف آئی اے کے حوالے کردیا اور رکن پنجاب اسمبلی کو 31 جولائی کودوبارہ پیش کرنے کا حکم دیا۔

(جاری ہے)

گذشتہ روز پی ٹی آئی کے ایم پی اے نذیر چوہان کے روبکار جیل کوٹ لکھپت پہنچتے ہی ایف آئی اے کی ٹیم نے انھیں دوبارہ گرفتار کر لیا تھا ۔

نذیر چوہان کو شہزاداکبر کی مدعیت میں درج مقدمے میں گرفتارکیا گیا تھا۔علاوہ ازیں رکن پنجاب اسمبلی نذیر چوہان کے خلاف ایک اور مقدمہ تھانہ گرین ٹائون میں درج کرلیا گیا ، مقدمہ ایس ایچ او گرین ٹائون صغیر احمد کی مدعیت میں درج کیا گیا۔مقدمے میں کار سرکار میں مداخلت، جان سے مارنے کی دھمکیوں سمیت دیگر دفعات شامل کی گئیں ہیں ۔ مقدمے کے متن میں کہا گیا ہے کہ آزاد کشمیر الیکشن کے دن نذیرچوہان ساتھیوں سمیت پولنگ اسٹیشن آئے اور ایم پی اے نذیر چوہان نے ایس ایچ او سے بد تمیزی کی۔متن میں مزید کہا گیا ہے کہ نذیرچوہان نے پولنگ اسٹیشن کے اندر زبردستی جانے کی کوشش کی جبکہ پولیس کے روکنے پر نذیرچوہان نے جان سے مارنے کی دھمکیاں دیں۔