Live Updates

سی پیک کے تحت کراچی کو جدید شہری انفرا اسٹرکچر زون کی فراہمی کا اعلان

3 اعشاریہ 5 ارب ڈالر سے مکمل ہونے والا منصوبہ کراچی کو ایک جدید شہری انفرا اسٹرکچر زون فراہم کرے گا ، کم لاگت کی رہائشی سہولت کی فراہمی سے ملحقہ آبادیوں کے 20 ہزار خاندانوں کی ری سیٹلمنٹ کی جائے گی۔ وفاقی وزیر علی زیدی

ساجد علی اتوار 26 ستمبر 2021 16:13

سی پیک کے تحت کراچی کو جدید شہری انفرا اسٹرکچر زون کی فراہمی کا اعلان

اسلام آباد ( اُردو پوائنٹ اخبارتازہ ترین ۔ 26 ستمبر 2021ء ) پاکستان تحریک انصاف کی وفاقی حکومت نے سی پیک کے تحت کراچی کو جدید شہری انفرا اسٹرکچر زون کی فراہمی کا اعلان کردیا۔ اطلاعات کے مطابق یہ اعلان وزارت بحری امور کی جانب سے کیا گیا ، منصوبہ کے پی ٹی کے ساتھ شراکت میں براہ راست چینی سرمایہ کاری سے تعمیر ہوگا ، 3 اعشاریہ 5 ارب ڈالر سے مکمل ہونے والا منصوبہ کراچی کو ایک جدید شہری انفرا اسٹرکچر زون فراہم کرے گا۔

سماجی رابطوں کی ویب سائٹ ٹوئٹر پر منصوبے کی تفصیلات جاری کرتے ہوئے وفاقی وزیر برائے ساحلی امور علی زیدی نے کہا کہ منصوبہ پاکستان کے لیے گیم چینجر ثابت ہوگا کیوں کہ اسلام آباد اور بیجنگ میں منعقد سی پیک پر دسویں جوائنٹ کوآپریشن کمیٹی کے اجلاس میں دونوں ممالک نے کراچی کوسٹل کمپری ہینسیو ڈیولپمنٹ زون کو سی پیک فریم ورک میں شامل کرنے پر اتفاق کرلیا ہے ، کراچی کوسٹل کمپری ہینسیو ڈیولپمنٹ زون (کے سی سی ڈی زیڈ) 3.5ارب ڈالر سے مکمل ہونے والا منصوبہ کراچی کو ایک جدید شہری انفرااسٹرکچر زون فراہم کرے گا ، منصوبے کے لیے کراچی پورٹ کے مغربی بیک واٹر کی 640 ایکڑ دلدلی زمین ری کلیم کی جائے گی جہاں منصوبہ کے پی ٹی کے ساتھ شراکت میں براہ راست چینی سرمایہ کاری سے تعمیر ہوگا۔

(جاری ہے)

THE GAME CHANGER!#KCCDZ #CPEC #KarachiPort #Pakistan pic.twitter.com/MzMjyiwD4k
— Ali Haider Zaidi (@AliHZaidiPTI) September 25, 2021

اپنے بیان میں انہوں نے کہا کہ چین کی معاونت سے تعمیر ہونے والے اس اہم پراجیکٹ کو ایک ہاربر برج کے ذریعے کراچی سے منسلک کیا جائے گا یہ پل پاکستان ڈیپ واٹر پورٹ کے عقب سے شروع ہوکر منوڑہ جزیرے اور سینڈزپٹ کے ساحل پر ختم ہوگا ، منصوبے میں لیاری ندی پر واٹر ٹریٹمنٹ پلانٹ کی تعمیر بھی شامل ہے ، وزیر اعظم عمران خان کے وژن کے تحت کم لاگت کی رہائشی سہولت کی فراہمی بھی کے سی سی ڈی زیڈ منصوبے کا حصہ ہے جس سے ملحقہ کی آبادیوں کے 20 ہزار خاندانوں کی ری سیٹلمنٹ کی جائے گی۔

علی زیدی نے بتایا کہ اس ماحول دوست منصوبے میں کراچی پورٹ پر چار نئی برتھوں کا بھی اضافہ کیا جائے گا جس سے پاکستان کے بڑھتے ہوئے میری ٹائم سیکٹر کی استعداد میں اضافہ ہوگا ، جدید سہولتوں سے آراستہ فشنگ پورٹ اور عالمی معیار کا فشریز پراسیسنگ زون بھی منصوبہ کا حصہ ہے جس سے پاکستان کے تجارتی امکانات میں اضافہ ہوگا ، منصوبہ میرین ایکو سسٹم کو بہتر بنانے کے ساتھ سمندری آلودگی کو بھی کم کرنے کا ذریعہ بنے گا۔