بابراعظم کا شعیب ملک کو ٹی ٹونٹی ورلڈ کپ سکواڈ میں شامل کرنے کا دفاع

لاہور (اردو پوائنٹ تازہ ترین اخبار ۔ 16 اکتوبر 2021ء ) پاکستان کے کپتان بابراعظم نے ٹیم میں تبدیلیوں کا دفاع کرتے ہوئے کہا کہ کچھ کھلاڑی قومی ٹی 20 کپ میں اپنی بہترین کارکردگی کا مظاہرہ نہیں کر رہے تھے۔ ایک ورچوئل پریس کانفرنس میں نمبر ون ون ڈے بیٹسمین نے ٹیم سلیکشن ، ٹی 20 ورلڈ کپ کے لیے ٹیم کی تیاری ، متحدہ عرب امارات کی پچوں کے حالات اور دیگر مسائل سمیت مختلف موضوعات پر بات کی۔

بابراعظم نے کہا کہ کچھ کھلاڑی نیشنل ٹی ٹونٹی کے دوران اچھی فارم میں نہیں تھے ، ٹیم میں تبدیلیاں اس لیے کی گئیں کیونکہ کچھ کھلاڑی اچھی کارکردگی نہیں دکھا سکے تھے۔ 27 سالہ کھلاڑی نے ٹیم میں نئے آنے والوں کا خیرمقدم کرتے ہوئے کہا کہ قومی ٹی 20 کپ کا تجربہ کھلاڑیوں کو اچھی کارکردگی دکھانے میں مدد دے گا۔

(جاری ہے)

انہوں نے کہا کہ شعیب ملک ایک تجربہ کار کھلاڑی ہے جسے ہمارے سکواڈ کے فٹ ممبروں میں بھی شمار کیا جاتا ہے۔

قومی ٹیم کے کپتان نے کہا کہ آئی سی سی ٹی 20 ورلڈ کپ جیسے بڑے ایونٹ میں اپنے ملک کی قیادت کرنا فخر اور اعزاز کی بات ہے لیکن یہ ایک مشکل کام بھی ہے۔ انہوں نے کہا کہ میگا ایونٹ میں ٹیم کی کپتانی میرے لیے ایک چیلنجنگ کردار ہے۔