دعا منگی اغوا کیس، اے ایس آئی سمیت چار ملزمان کی درخواست ضمانت مسترد

جمعرات 14 اپریل 2022 16:06

کراچی(اُردو پوائنٹ اخبارتازہ ترین - این این آئی۔ 14 اپریل2022ء) دعا منگی اغوا کیس کے فرار ملزم کیس میں نامزد اے ایس آئی سمیت چار ملزمان کی درخواست ضمانت مسترد کردی گئی ہے۔جمعرات کوجوڈیشل مجسٹریٹ شرقی شیخ عباس مہدی کی عدالت میں دعا منگی اغوا کیس میں قیدی ذوہیب قریشی کے فرار ہونے کے معاملے میں ملوث گرفتار پولیس اہلکاروں کی درخواست ضمانت پر سماعت ہوئی۔

عدالت نے اے ایس آئی خالد سمیت چار ملزمان کی درخواست ضمانت مسترد کردی دیگر ملزمان میں ہیڈ کانسٹیبل محمد یونس، نایاب احمد اور پولیس کانسٹیبل حبیب شامل ہیں۔

(جاری ہے)

کیس کا تاحال حتمی چالان بھی عدالت میں جمع نہ ہو سکا ہے۔ تفتیشی افسر نے کہا کہ موبائل فرانزک کے لیے ارسال کئے جاچکے ہیں۔ فارنزک رپورٹ کے بغیر تحقیقات مکمل نہیں ہوسکتی ہے۔پولیس نے کیس میں موقف اپنایاکہ اے ایس آئی خالد خود کو اور دیگر ملزمان کو بچانے کے لیے مدعی مقدمہ بن گیا تھادوران تفتیش پتہ چلا کہ مدعی خالد واقعہ میں ملوث تھا۔

پولیس کے مطابق زوہیب قریشی کو اہل خانہ سے ملاقات کے لئے بھی ملزم خالد بھیجا کرتا تھا۔ مذکورہ ملزمان کی ڈیوٹیاں بھی خالد ہی لگایا کرتا تھا۔ ملزم زوہیب قریشی کے فرار کا مقدمہ سرکاری مدعیت میں درج کیا گیا تھا۔