Live Updates

عمران خان کے الزام پر انکوائری کمیشن بنایا جا رہا ہے ‘محسن نقوی

میں نے الیکشن نہیں لڑنا،سیاست نہیں کرنی لیکن لوگوں کی فلاح وبہبود کا کام ضرور کرنا ہے

جمعرات 23 مارچ 2023 23:13

عمران خان کے الزام پر انکوائری کمیشن بنایا جا رہا ہے ‘محسن نقوی

لاہور (اُردو پوائنٹ اخبارتازہ ترین - این این آئی۔ 23 مارچ2023ء) وزیراعلیٰ پنجاب محسن نقوی نے کہا ہے کہ الیکشن کی تاریخ کے معاملے میں صرف پنجاب حکومت کا عمل دخل نہیں،الیکشن کاتعین کر نے میں بہت سے ادارے کارفرماں ہوتے ہیں،سوچ سمجھ کر ہی فیصلہ کیاگیا ہوگا،عمران خان بڑی پارٹی کے سربراہ ہیں،انہوں نے الزام لگایا ہے اس کی تحقیقات کر کے کارروائی ہونی چاہیے،پولیس پر الزامات کی تحقیقات کے لئے کمیشن بنانے کا فیصلہ کیا گیا ہے۔

یوم پاکستان پر مزاراقبالؒ پر حاضری کے بعد میڈیا سے گفتگوکرتے ہوئے محسن نقوی نے کہا کہ میں نے الیکشن نہیں لڑنا،سیاست نہیں کرنی لیکن لوگوں کی فلاح وبہبود کا کام ضرور کرنا ہے۔5 ارب روپے صرف رمضان بازار لگانے پر خرچ آرہا تھا۔ گزشتہ برس ٹینٹ کا کرایہ 2ارب 40کروڑ تھا، اب یہ سارامالی فائدہ عوام کو پہنچانا چاہتے ہیں۔

(جاری ہے)

پہلے لینڈ کروزر والے کو بھی امدادی نرخ پر آٹا مل رہا تھا،اب صرف مستحقین کو مفت دیں گے۔

عوام بے نظیر انکم سپورٹ پروگرام میں مفت آٹے کیلئے رجسٹریشن کراسکتے ہیں۔چپ کے بغیر شناختی کارڈ والوں کو رجسٹر پر اندراج کر کے آٹادینے کے احکامات پر عملدر آمد شروع ہوگیا ہے۔انہوں نے کہاکہ شفافیت کو یقینی بنانے کیلئے آٹے کے حصول کیلئے کمپیوٹر اورسسٹم پر اندراج یقینی بنایا ہے۔پنجاب بھر میں چندر وز میں 50لاکھ آٹے کے بیگز مستحقین میں تقسیم کیے جا چکے ہیں۔فری آٹے کی تقسیم یقینی بنانے کیلئے میں خود جاکر فیلڈ میں جائزہ لے رہا ہوں۔صوبائی وزراء اظفر علی ناصر، عامر میر،سیکرٹری اطلاعات علی نواز ملک،سیکرٹری اوقاف طاہر رضا، سی سی پی او لاہور کمشنر لاہور، ڈپٹی کمشنر اور دیگر حکام بھی اس موقع پر موجود تھے۔