Live Updates

حکمرانوں کو الیکشن سے بھاگنے نہیں دیں گے، عمران خان

انتخابی عمل سبوتاژ کرنے کے خلاف آئینی، قانونی اور سیاسی محاذ پر جدوجہد کریں گے۔ چیئرمین پی ٹی آئی کا بیان

ساجد علی اتوار 26 مارچ 2023 15:40

حکمرانوں کو الیکشن سے بھاگنے نہیں دیں گے، عمران خان

لاہور ( اُردو پوائنٹ اخبارتازہ ترین ۔ 26 مارچ 2023ء ) پاکستان تحریک انصاف کے چیئرمین عمران خان نے کہا ہے کہ آئین کے تحت انتخابات ہوکررہیں گے، حکمرانوں کو الیکشن سے بھاگنے نہیں دیں گے۔ میڈیا رپورٹس کے مطابق چیئرمین تحریک انصاف عمران خان نے انتخابی تیاریاں جاری رکھتے ہوئے انتخابی امور کے لئے پارٹی الیکشن سیل قائم کردیا ہے، ہمایوں اختر پی ٹی آئی الیکشن سیل کے فوکل پرسن ہوں گے، اعجاز چوہدری، ریاض فتیانہ اوررائے عزیز اللہ کو الیکشن سیل میں بطور ممبرز نامزد کیا گیا ہے، پارٹی الیکشن سیل انتخابات کے حوالے سے تکنیکی امور دیکھے گا، ووٹر لسٹوں، بلاک کوڈ اوردیگر تکنیکی معاملات پر امیدواروں کی معاونت کرے گا۔

اس موقع پر سابق وزیراعظم عمران خان نے کہا کہ الیکشن سیل بھرپور اندازسے انتخابی امور سے پارٹی قیادت اورامیدواروں کو آگاہ رکھے گا، آئین کے تحت انتخابات ہوکررہیں گے، حکمرانوں کو الیکشن سے بھاگنے نہیں دیں گے، انتخابی عمل سبوتاژ کرنے کے خلاف آئینی، قانونی اور سیاسی محاذ پر جدوجہد کریں گے۔

(جاری ہے)

دوسری طرف سپریم کورٹ نے پی ٹی آئی کی پنجاب میں الیکشن التواء کی درخواست سماعت کیلئے منظور کرلی ہے، رجسٹرار سپریم کورٹ آفس نے درخواست پر کوئی اعتراض عائد نہیں کیا، رجسٹرار آفس نے پی ٹی آئی کی درخواست پر نمبر لگا دیا ہے۔

اس حوالے سے تحریک انصاف کے سینئر رہنما اسد عمر نے بتایا کہ الیکشن کمیشن کے پنجاب اسمبلی الیکشن ملتوی کرنے کے فیصلے کے خلاف سپریم کورٹ میں پٹیشن جمع کروا دی ہے، الیکشن کمیشن کے فیصلے کے خلاف اسپیکر پنجاب اسمبلی سبطین خان اور اسپیکر خیبرپختونخوا اسمبلی مشتاق غنی نے مشترکہ آئینی درخواست دائر کی۔