ہر شخص ملک کی تعمیر و ترقی کے لیے مثبت قدم اٹھائے گا تو انشا اللہ ملک میں ترقی،خوشحالی واستحکام آئے گا، بلیغ الرحمن

لاہور (اُردو پوائنٹ اخبارتازہ ترین - این این آئی۔ 25 مئی2023ء) گورنر پنجاب محمد بلیغ الرحمن سے یہاں گورنر ہائوس لاہور میں سابق ممبران قومی و صوبائی اسمبلی کے وفود نے ملاقاتیں کیں۔ملاقاتوں میں ملک کی سیاسی اور معاشی صورتحال پر تبادلہ خیال کیا گیا۔اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ ملک و قوم کے لیے جانوں کے نذرانے پیش کرنے والے شہدا کی قربانیاں ناقابل فراموش ہیں۔

انہوں نے کہا کہ افواج پاکستان اور قانون نافذ کرنے والے اداروں کے شہدا ہمارا فخر ہیں اور ان کی عزت و تکریم سب پر واجب ہے ۔ گورنر پنجاب نے کہا کہ2013 سے 2018 تک تعلیم اور صحت کے شعبوں میں ترقی پر خصوصی توجہ دی گئی اور اس کے ساتھ ساتھ ہائر ایجوکیشن اور ریسرچ کا بجٹ بھی کئی گنا بڑھایا گیا۔

(جاری ہے)

انہوں نے کہا کہ اس دور میں محمد شہباز شریف کی بطور وزیر اعلی پنجاب کاوشوں کی وجہ سے آئوٹ آف سکول چلڈرن کی تعداد میں نمایاں کمی آئی تھی۔

انہوں نے کہا کہ 2018 کے بعد بدقسمتی سے ہائر ایجوکیشن کا بجٹ بڑھانے کی بجائے کم کر دیا گیا اور معیشت، صحت اور تعلیم سمیت تمام شعبوں میں ترقی کی بجائے تنزلی ہوئی۔گورنر پنجاب محمد بلیغ الرحمن نے کہا کہ حکومت مشکل حالات کے باوجود معیشت سمیت دیگر شعبوں میں استحکام اور ترقی کے لیے پر عزم ہے۔انہوں نے کہا کہ اللہ تعالی کے فضل و کرم اور حکومت کی کوششوں کی بدولت معیشت سمیت مختلف شعبوں میں بہتری آ رہی ہے۔

گورنر پنجاب نے کہا کہ موجودہ حالات میں سب کو ملکر مثبت سوچ کے ساتھ ملک کی تعمیر و ترقی میں اپنا کردار ادا کرنا ہے۔انہوں نے مزید کہا کہ ملک کی تعمیر و ترقی میں ہر شخص کو مثبت کردار ادا کرنا ہے ۔ انہوں نے مزید کہا کہ چھوٹے چھوٹے مثبت کام معاشرے میں ایک بڑی مثبت تبدیلی کا باعث بنتے ہیں اور ہزاروں میل کا سفر ایک قدم سے شروع ہوتا ہے۔انہوں نے کہا کہ آج ہر شخص ملک کی تعمیر و ترقی کے لیے ایک مثبت قدم اٹھائے گا تو انشا اللہ ملک میں ترقی،خوشحالی اور استحکام آئے گا۔

گورنر پنجاب نے سابق ممبران قومی و صوبائی اسمبلی کو ہدایت کی کہ وہ عوام کی خدمت کریں اور لوگوں کے مسائل حل کرنے میں اپنا بھر پور کردار ادا کریں۔اس موقع پر سابق ممبران قومی و صوبائی اسمبلی نے کہا کہ9 مئی کو شر پسندوں کی جانب سے اداروں ، فوجی تنصیبات پر حملوں کے واقعات نہایت افسوس ناک اور ملک کی تاریخ کا سیاہ ترین باب ہے۔وفود میں سابق سپیکر پنجاب اسمبلی رانا محمد اقبال، ایم این اے جاوید حسنین شاہ ،سابق ایم این اے صاحبزادہ فیض الحسن ،سابق ایم پی اے مولانا الیاس منظور چنیوٹی اور آصف رفیق رجوانہ ایڈوکیٹ شامل تھے ۔