’نوجوان تیاری کریں‘ آئی جی پنجاب نے پولیس میں نئی بھرتیوں کی خوشخبری سنادی

نئے سب انسپکٹرز اور پی کیڈٹس کی بھرتیوں کے لئے حکومت سے اجازت طلب کرلی ہے، نوجوان موثر سروس ڈلیوری سے پنجاب پولیس کو پہلے سے بہتر ادارہ بنانے میں کردار ادا کریں گے۔ ڈاکٹرعثمان انور کی میڈیا سے گفتگو

ساجد علی اتوار 4 جون 2023 21:30

’نوجوان تیاری کریں‘ آئی جی پنجاب نے پولیس میں نئی بھرتیوں کی خوشخبری ..

لاہور ( اُردو پوائنٹ اخبارتازہ ترین ۔ 04 جون 2023ء ) انسپکٹر جنرل پولیس پنجاب ڈاکٹر عثمان انور نے پولیس فورس میں نئی بھرتیوں اور محکمانہ ترقیوں کے حوالے سے فورس اور عوام الناس کے نام اہم پیغام جاری کیا ہے۔ میڈیا سے گفتگو میں آئی جی پنجاب نے بتایا کہ ریکارڈ ترقیوں کے تسلسل میں آج سے پنجاب پولیس میں 8500 نئی پروموشنز کا آغاز ہوچکا ہے، سال 2009 بیج کے اے ایس آئیز کی پروموشنز کلئیر کر رہے ہیں جب کہ ساتھ ہی 2010ء بیج کے اے ایس آئیز کی ترقیوں کا بھی آغاز کریں گے، چند ہفتوں میں کانسٹیبل سے ڈی ایس رینک پر رہ جانے والی تمام سیٹوں پر قواعد و ضوابط کے مطابق ہزاروں افسران و اہلکاروں کو پروموشنز دیں گے۔

ڈاکٹر عثمان انور نے مزید کہا کہ نئے خون اور جوش و جذبے سے سرشار نوجوانوں کو پولیس فورس کا حصہ بنانے کیلئے نئی بھرتی شروع کی جا رہی ہے، الیکشن کمیشن اور پنجاب کابینہ نے پنجاب پولیس میں پولیس سٹیشن اسسٹنٹس اورسینئر سٹیشن اسسٹنٹس کی بھرتی کی منظوری دے دی ہے، مذکورہ بھرتیوں کیلئے اشتہار آئندہ چند روز میں آ جائے گا، لہذا نوجوان امتحان کی تیاری شروع کریں۔

(جاری ہے)

انہوں نے کہا کہ بھرتی کیلئے کمپیوٹر اینڈ کمیونیکیشن سکلز پر مبنی ٹیکنالوجی بیسڈ تحریری امتحان اور انٹرویو ہو گا جس میں نوجوانوں کی انفارمیشن ٹیکنالوجی میں مہارت، شہریوں کی خدمت کے لئے جذبہ چیک کیا جائے گا، میرٹ کی بنیاد کئی سو نوکریاں باصلاحیت اور ہنرمند نوجوانوں کو دی جائیں گی، پولیس فورس میں نئے سب انسپکٹرز اور پی کیڈٹس کی بھرتیوں کے لئے بھی حکومت پنجاب سے اجازت طلب کر لی گئی ہے، کانسٹیبلز، ہیڈ کانسٹیبلز اور اے ایس آئیز کی سیٹوں پر منتخب ہونے کیلئے امتحان کی تیاری اب امیدواروں کو کرنی ہے۔

آئی جی پنجاب نے کہا کہ نوجوان سب انسپکٹرز اور پرعزم کمپیوٹر گرایجویٹس موثر سروس ڈلیوری سے پنجاب پولیس کو پہلے سے بہتر ادارہ بنانے میں اپنا کردار ادا کریں گے، انفارمیشن ٹیکنالوجی کی جدید تعلیم اور مہارتوں سے لیس اور میرٹ بیسڈ امتحانوں سے منتخب ہونے والے نئے نوجوان پاکستانیوں کی خدمت و حفاظت کا عظیم فریضہ سر انجام دیں گے۔