پی ٹی آئی میں ہوں، پی ٹی آئی میری جماعت ہے

میں جہاں ہوں وہاں ہوں،پرویز خٹک کو پارٹی شوکاز نوٹس جاری کر چکی، اسد قیصر کی گفتگو

مقدس فاروق اعوان پیر 3 جولائی 2023 13:42

پی ٹی آئی میں ہوں، پی ٹی آئی میری جماعت ہے

لاہور (اُردو پوائنٹ،اخبارتازہ ترین ۔ 03 جولائی 2023ء) پاکستان تحریک انصاف کے رہنما اسد قیصر 9 مئی کے احتجاج کے تناظر میں درج مقدمہ میں ضمانت کرانے اسلام آباد ہائیکورٹ پہنچے ۔پرویز خٹک اور پی ٹی آئی میں سے ایک کے انتخاب متعلق سوال ہوا تو اسد قیصر نے جواب دیا پی ٹی آئی میں ہوں، پی ٹی آئی میری جماعت ہے۔انہوں نے مزید کہا کہ میں جہاں ہوں وہاں ہوں، پرویز خٹک کو پارٹی کی جانب سے شوکاز نوٹس جاری ہو چکا ہے۔

میں جہاں ہوں وہاں ہوں، میں تحریک انصاف میں ہوں اور وہی میری پارٹی ہے، اسد قیصر pic.twitter.com/snznQ1A3U7
— Khurram Iqbal (@khurram143) July 3, 2023

خیال رہے کہ پی ٹی آئی قیادت نے سابق وفاقی وزیر پرویز خٹک کی بنیادی رکنیت ختم کرنے اور پارٹی سے نکالنے کا فیصلہ کر لیا،اراکین کو تحریک انصاف چھوڑنے کیلئے اکسانے اور شوکاز نوٹس کا جواب نہ دینے پر پرویز خٹک کو پارٹی سے نکالنے کا فیصلہ کیا گیا۔

(جاری ہے)

جیو نیوز کی رپورٹ کے مطابق پی ٹی آئی نے اراکین کو پارٹی چھوڑنے کیلئے اکسانے پر پرویز خٹک کو شوکاز نوٹس جاری کرتے ہوئے 7 روز میں جواب طلب کیا تھا تاہم سابق وزیراعلٰی خیبر پختو نخوا نے پارٹی نوٹس کا جواب دینے سے انکار کرتے ہوئے کہا ہے کہ وہ کوئی سرکاری ملازم نہیں جو شوکاز نوٹس کا جواب دیں۔

انکا کہنا تھا 9 مئی کے واقعات چیئرمین پی ٹی آئی کا چند افراد سے مشاورت کا نتیجہ ہے،عمران خان کو ہمیشہ مثبت سیاست اور سوچ اپنانے کا کہا لیکن انکا ایجنڈا کچھ اور ہی تھا۔ رپورٹ میں ذرائع کے حوالے سے بتایا گیا کہ تحریک انصاف کے 30 سے زائد سابق ارکان اسمبلی نے پرویز خٹک کو اپنی حمایت کی یقین دہانی کرائی ہے جس کے بعد ممکنہ طور پر سابق وزیراعلٰی خیبر پختو نخوا جلد ہی اپنے آئندہ کے لائحہ عمل کا اعلان کریں گے۔ یاد رہے کہ گزشتہ دنوں پی ٹی آئی رہنماؤں کو جماعت سے علیحدگی اختیار کرنے پر اکسانے کے الزام پر پارٹی کے مرکزی سیکرٹری جنرل عمر ایوب کی جانب سے سابق وزیر دفاع پرویز خٹک کو اظہارِ وجوہ کا نوٹس جاری کیا تھا