ڈی آئی جی ہزارہ کا بالاکوٹ کی حدود میں جاری ترقیاتی پراجیکٹس اور چائنیز کیمپ کا دورہ

پراجیکٹس عہدیدران نے محمد اعجاز خان کو پراجیکٹ ،سیکیورٹی بارے بریفنگ دی پراجیکٹس اور چائینز کوتحفظ فراہم کرنا حکومت پاکستان اور ہزارہ پولیس کی اولین ترجیح ہے، ڈی آئی جی ہزارہ

ہفتہ 9 ستمبر 2023 20:55

پشاور(اُردو پوائنٹ اخبارتازہ ترین - این این آئی۔ 09 ستمبر2023ء) ڈپٹی انسپکٹرجنرل آف پولیس ہزارہ ریجن محمد اعجاز خان کا بالاکوٹ مانسہرہ میں جاری سکی کناری ہائیڈرو پاور پراجیکٹ، گھنول ہائڈرو پاور پراجیکٹ اور چائینز کیمپ کا دورہ جہاں انہوں نے آرمی افسران، پراجیکٹس عہدیدران اور چائینیز عہدیداران سے ملاقات کی اور پراجیکٹس اور سیکیورٹی کے حوالے سے اہم امور پر تبادلہ خیال کیا۔

پراجیکٹس اور چائینیز عہدیداران نے ڈی آئی جی ہزارہ کو سیکیورٹی و دیگر امور کے حوالے سے تفصیلی بریفنگ پیش کی۔ ڈی آئی جی ہزارہ محمد اعجاز خان نے چائینز عہدیداران سے بات چیت کرتے ہوئے کہا کہ ملک بھر میں جاری تمام چائنیز پراجیکٹ پاکستان کی تعمیر و ترقی میں اہمیت کے حامل ہیں۔ پاکستان کی ترقی میں چین کا کردار قابل ستائش اور قابل قدر ہے۔

(جاری ہے)

پاکستان میں مقیم چائینز کوتحفظ فراہم کرنا حکومت پاکستان اور ہزارہ پولیس کی اولین ترجیح ہے جس میں کسی قسم کی کوئی کوتاہی نہیں کی جائے گی۔ ڈی آئی جی ہزارہ محمد اعجاز خان نے اس موقع پر ڈسٹرکٹ پولیس آفیسر مانسہرہ ظہور بابر آفریدی و دیگر پولیس افسران کو ہدایت دی کہ چائنیز کی سیکیورٹی کو مزید موثر اور بہتر بنائیں اور انکے ساتھ روابط کو مزید مستحکم بنایا جائے تاکہ کسی بھی ہنگامی صورتحال میں پولیس بروقت انکی مدد کرسکے۔ ڈی آئی جی ہزارہ نے چائینز عہدیداران کو اپنے مکمل تعاون کی یقین دہانی کروائی جس پر چائینز عہدیداران نے ڈی آئی جی ہزارہ کے اس اقدام کو سراہا اور کہا کہ ہزارہ پولیس کی جانب سے مہیا کردہ سیکیورٹی پر مکمل اطمینان اور اعتماد ہے۔