سیکرٹری امور کشمیر بابر حیات تارڑ سے آل پارٹیز حریت کانفرنس کے وفد کی ملاقات

جمعہ 22 ستمبر 2023 22:46

اسلام آباد (اُردو پوائنٹ اخبارتازہ ترین - اے پی پی۔ 22 ستمبر2023ء) سیکرٹری امور کشمیر بابر حیات تارڑ نے کہا ہے کہ پاکستان کشمیریوں کی حق خودارادیت کی سیاسی اور سفارتی حمایت جاری رکھے گا، نہتے کشمیریوں کے حقوق کو اجاگر کرنے میں کل جماعتی حریت کانفرنس کا بڑا اہم کردار ہے۔ ان خیالات کا اظہار انہوں نے جمعہ کو آل پارٹیز حریت کانفرنس کے وفد سے ملاقات کے دوران کیا۔

وفد میں کل جماعتی حریت کانفرنس کے سیکرٹری جنرل شیخ عبد المتین اور سیکرٹری انفارمیشن امتیاز وانی شامل تھے۔ ملاقات میں 27 اکتوبر کو یوم سیاہ منانے اور مقبوضہ کشمیر میں انسانی حقوق کی صورتحال کے حوالے سے تبادلہ خیال کیا گیا۔ بابر حیات تارڑ نے کہا کہ نہتے کشمیریوں کے حقوق کو اجاگر کرنے میں کل جماعتی حریت کانفرنس کا بڑا اہم کردار ہے، پاکستان کشمیریوں کی حق خودارادیت کی سیاسی اور سفارتی حمایت جاری رکھے گا۔

(جاری ہے)

انہوں نے کہا کہ تمام عالمی فورمز پر کشمیریوں کے حقوق کی آواز بلند کرتے رہیں گے ۔ انہوں نے کہا کہ مقبوضہ کشمیر پر بھارتی غیر قانونی قبضے کے خلاف 27 اکتوبر کو یوم سیاہ بھرپور انداز سے منائیں گے، بھارتی غیر قانونی تسلط کے خلاف پوری پاکستانی اور کشمیری قوم سراپا احتجاج ہوں گی۔شیخ عبد المتین نے کہا کہ 5 اگست 2019 کے بھارتی غیر قانونی اقدامات سے مقبوضہ کشمیر دنیا کی سب سے بڑی جیل بن چکا ہے، مقبوضہ کشمیر میں کشمیریوں کی مذہبی آزادی اور شناخت، شدید خطرات سے دوچار ہے، مسئلہ کشمیر کے حل کے ضمن میں پاکستان کشمیریوں کی امیدوں کا مرکز ہے۔ انہوں نے کہا کہ 27 اکتوبر یوم سیاہ کے موقع پر زیادہ سے زیادہ عوام بھارت کے خلاف احتجاجی ریلیوں میں شرکت کریں۔