و اپڈا کے پن بجلی کے زیر تعمیر منصوبے قومی نظام میں سستی بجلی کا اضافہ کرنے میں نمایاں کردار ادا کرینگے،محمد علی

لاہور(اُردو پوائنٹ اخبارتازہ ترین - این این آئی۔ 22 ستمبر2023ء) نگران وفاقی وزیر برائے توانائی محمد علی نگران نے کہا ہے کہ و اپڈا کے پن بجلی کے زیر تعمیر منصوبے ہمارے قومی نظام میں سستی بجلی کا اضافہ کرنے میں نمایاں کردار ادا کریں گے،بجلی کی ترسیل کے نظام کی استعداد کار بڑھانے کے لئے فوری اقدامات کرنے کی ضرورت ہے تا کہ اسے ملک کی بجلی کی پیداواری صلاحیت کے مطابق بنایا جاسکے،عالمی بینک اور ایشیائی ترقیاتی بینک جیسے بین الاقوامی مالیاتی ادارے بجلی کی ترسیل کے منصوبوں کے لئے فنڈز فراہم کرنے کے لیے تیار ہیں۔

ان خیالات کا اظہار انہوں نے واپڈا ہائوس کے دورہ کے دوران گفتگو کرتے ہوئے کیا۔اس موقع پر وفاقی وزیر کو واپڈا، نیشنل ٹرانسمیشن اینڈ ڈسپیچ کمپنی لمیٹڈ ، لیسکو، نیسپاک اور پاور انفارمیشن ٹیکنالوجی کمپنی بارے بھی بریفنگ دی گئی۔

(جاری ہے)

واپڈا ہائوس آمد پر چیئرمین واپڈا انجینئر لیفٹیننٹ جنرل(ر)سجاد غنی اور اتھارٹی ممبرز نے وفاقی وزیر کا استقبال کیا۔

وفاقی وزیر توانائی محمد علی کو بریفنگ کے دوران بتایا گیا کہ زیر تعمیر واپڈا منصوبوں کی مرحلہ وار تکمیل سے 2024 سے 2029 تک کم لاگت اور ماحول دوست پن بجلی کی پیداوار10 ہزار میگا واٹ اضافہ کے ساتھ 9 ہزار 500 سے بڑھ کر 19 ہزار 500 میگا واٹ ہو جائے گی۔وفاقی وزیر محمد علی کو دیا مر،بھاشا ڈیم اور داسو ہائیڈرو پراجیکٹ کی ٹرانسمیشن،پن بجلی کے ٹیرف اور سی پی پی اے کی جانب سے واپڈا کو پن بجلی کی مد میں زیر التوا ء ادائیگیوں کے حوالے سے بھی آگاہ کیا گیا۔

این ٹی ڈی سی کے ڈاکٹر رانا عبدالجبار خان نے ادارے کے مینڈیٹ، افعال اور کارکردگی کے حوالے سے بریفنگ دی اور بتایا کہ این ٹی ڈی سی کی قابل اعتماد طریقے سے بجلی نکالنے کی صلاحیت اس وقت لگ بھگ 27,000 میگاواٹ ہے اور آئندہ تین سالوں میں اس کے 30,000 میگا واٹ سے زیادہ ہونے کا امکان ہے۔وفاقی وزیر توانائی محمد علی نے بجلی کی ترسیل کے نظام کی صلاحیت کو بڑھانے کی اہمیت پر زور دیا تاکہ اسے ملک کی بجلی کی پیداواری صلاحیت کے مطابق بنایا جا سکے۔

چیف ایگزیکٹو لیسکو کی جانب سے وزیر توانائی کو لیسکو کی مجموعی کارکردگی پر بریفنگ دی گئی،ڈائریکٹر کسٹمر سروسز نے بجلی چوروں کے خلاف جاری مہم اور وصولیوں بارے تفصیلی آگاہ کیا۔انہوں نے کہا کہ عالمی بینک اور ایشیائی ترقیاتی بینک جیسے بین الاقوامی مالیاتی ادارے بجلی کی ترسیل کے منصوبوں کے لئے فنڈز فراہم کرنے کے لیے تیار ہیں۔وفاقی وزیر نے ٹرانسمیشن کے منصوبوں کے لیے ضروری آلات کی مقامی تیاری کے فروغ پر بھی زور دیا اور یقین دلایا کہ این ٹی ڈی سی کے منصوبوں کے لیے آلات کی درآمد میں رکاوٹ بننے والے زرمبادلہ کے مسائل کو جلد حل کر لیا جائے گا۔

وزیر توانائی نے سردیوں کے موسم میں بجلی کی لوڈشیڈنگ سے بچنے کے لیے فعال اقدامات کی اہمیت کو اجاگر کیا۔انہوں نے SCADA-III اپ گریڈیشن پراجیکٹ کی بروقت تکمیل پر بھی زور دیا۔نگران وفاقی وزیر نے لیسکو ٹیم کو ہدایت کی کہ صارفین سے وصولیوں کو بہتر بنایا جائے اور بجلی چوری کے خلاف مہم تیز کی جائے۔وفاقی وزیر نے نیسپاک انتظامیہ پر زور دیا کہ وہ اپنے منصوبوں پر کام کی رفتار تیز کریں۔

چیف ایگزیکٹو آفیسر پی آئی ٹی سی نے نگران وفاقی وزیر کو تنظیم کے بارے میں بریفنگ دی اور کہا کہ پی آئی ٹی سی تقسیم کار کمپنیوں کو آئی ٹی سلوشنز فراہم کر رہی ہے۔ وزیر توانائی نے پی آئی ٹی سی کو صارفین کی شکایات کے بروقت حل کے لیے مضبوط نظام تیار کرنے کی ہدایت کی اور کہا کہ ایپلی کیشنز اور سافٹ ویئرز کی ترقی کو بھی بین الاقوامی مشق کے ساتھ ہم آہنگ کیا جانا چاہیے۔