مہنگائی ، بجلی کی قیمتوں میں اضافہ کیخلاف احتجاجی تحریک جاری رکھیں گے، سراج الحق

لاہور(اُردو پوائنٹ اخبارتازہ ترین - این این آئی۔ 22 ستمبر2023ء) امیرجماعت اسلامی سراج الحق نے کہا ہے کہ مہنگائی اور بجلی کی قیمتوں میں اضافہ کے خلاف احتجاجی تحریک جاری رکھیں گے، لاہور گورنرہائوس کے بعد کوئٹہ گورنرہائوس کے باہر دھرنے کا آغاز ہوگا،گزشتہ پانچ برس تباہی آئی ، مافیا نے مال بنایا اورقوم کا کچومر نکل گیا،لوگ مہنگائی، بے روزگاری سے نفسیاتی مریض بن گئے،جن پارٹیوں نے مہنگائی کے خلاف جلوس نکالے وہ اپنی حکومت کے 16 ماہ کے دوران گرانی میں سو فیصد اضافہ کرگئے،نگران حکومت سے مطالبہ ہے کہ بجلی بلوں میںشامل بے جاٹیکسز ختم کیے جائیں، بجلی چوری اورحکمران اشرافیہ کی مفت خوری بند کی جائے، آئی پی پیز معاہدوں پر نظرثانی کی جائے، معاہدوں کے ذمہ داران قوم کے مجرم ، ان کا احتساب ہو، ملک میں لاکھوں میگاواٹ سستی بجلی پیدا کرنے کے وسائل موجود ، سابقہ حکومتوں نے ملک و قوم دشمنی کا ثبوت دیا اور درآمدی فیول کے کارخانے لگوائے گئے، کمیشن اور کرپشن نے توانائی کا پورا سیکٹر تباہ کردیا۔

(جاری ہے)

ان خیالات کا اظہار انہوں نے گورنرہائوس کے سامنے دھرنے کے دوسرے روز شرکاء سے خطاب کرتے ہوئے کیا۔ نائب امیر لیاقت بلوچ، سیکرٹری جنرل امیرالعظیم، سیکرٹری اطلاعات قیصر شریف، ڈپٹی سیکرٹری جنرل اظہر اقبال حسن،ایم این اے عبد الاکبر چترالی،امیر جماعت اسلامی پنجاب وسطی جاوید قصوری،امیر جماعت اسلامی پنجاب شمالی ڈاکٹر طارق سلیم، امیر جماعت اسلامی لاہور ضیاالدین انصاری ایڈووکیٹ، نائب امیر لاہور ذکراللہ مجاہد، مرکزی رہنما حافظ محمد ادریس اور دیگر قائدین بھی دھرنے میں شریک تھے۔

اس موقع پر بانی جماعت سید مودودیؒ کی یوم وفات کی مناسبت سے خصوصی دعا بھی کروائی گئی۔احتجاج میں عوام کی بڑی تعداد شرکت کررہی ہے۔سراج الحق نے کہا کہ جماعت اسلامی نے دوستمبر کی ملک گیر شٹر ڈائون ہڑتال کے بعد جنوبی پنجاب سے مہنگائی اور بجلی کی قیمتوں میں اضافہ کے خلاف احتجاجی تحریک کے دوسرے مرحلے کا آغاز کیا تھا۔ لیہ، مظفرگڑھ ،رحیم یارخان،راولپنڈی اور فیصل آباد میں جلسوں کے بعد پشاور گورنر ہائوس کے باہر تین دن دھرنا دیا گیا اورا ب لاہور کا دھرنا جاری ہے۔

انہوں نے کہا ملک میں نظام نہیں چہرے بدلتے ہیں، فرسودہ سسٹم کا ایک چوکیدار تھک جائے یا بے توقیر ہوجائے تو دوسرا آجاتا ہے،سب سٹیٹس کو کے تحفظ پر مامور ہیں ۔ پاکستان اسلام کے نام پر بنا ، قوانین انگریزوں کے چل رہے ہیں۔ ضابطہ فوجداری ہویا دیوانی، پٹوار خانہ ہو یاپولیس، تعلیم ہویا معیشت ، سب راج کا تسلسل ہے، انگریز جاتے جاتے کالے انگریز مسلط ہوگئے، 76برسوں میں کرپٹ اشرافیہ نے قوم پر اتنا ظلم کیا کہ کوئی دشمن بھی ایسا نہیں کرسکتا ،یہ آستین کے سانپ ہیں۔

حکمرانوں نے ہمیشہ قوم کی بجائے اپنے اور اپنی اولادوں کے مفادات کاتحفظ کیا۔آئی ایم ایف کی غلامی اختیار کی گئی جہاں سے حکومت کو بجلی کے بلوں کی قسطوں میں وصولی کی بھی سے اجازت نہ ملی،25 کروڑ عوام کواستعمار اور اس کے وفاداروں سے آزادی چاہیے ، غلامی کی زنجیریں توڑنا ہوں گی، پرامن جدوجہد واحد راستہ ہے ۔ سراج الحق نے کہا کہ عوامی حقوق کی جدوجہد مقاصد کے حصول تک کسی صورت ترک نہیں کریں گے۔

مومن کی زندگی جدوجہد سے عبارت ہے، خاموشی حل نہیں ۔ انہوں نے کہا کہ لاہور کی انتظامیہ نے کارکنان کوتنگ کیا، ہمیں اشتعال دلانے کی کوششیں کی گئیں، لیکن ہم ہر حال میں پرامن رہیں گے، یہ زمین ہماری ، ملک ہمارا ہے، جہاں چاہیں گے بیٹھیں گے۔ پنجاب کے عوام کا احتجاج میں شرکت پر شکریہ ، لاہوریوں کو سلام پیش کرتا ہوں۔ عوام کے پاس بھی جماعت اسلامی کی صورت میں واحد آپشن ہے، ہمیں متحد ہوکر ملک بچانا ہے اور اسے پرامن، ترقی یافتہ، کرپشن فری اسلامی پاکستان بنانا ہے۔