بھارت نے اپنا جاسوسی نیٹ ورک مغربی ممالک میں وسیع پیمانے پرپھیلا رکھا ہے، وال اسٹریٹ جرنل

ہفتہ 30 ستمبر 2023 21:46

واشنگٹن (اُردو پوائنٹ اخبارتازہ ترین - آن لائن۔ 30 ستمبر2023ء) امریکی جریدے وال اسٹریٹ جرنل نے پرتشدد بھارتی دفاعی پالیسی کا راز فاش کرتے ہوئے کہا ہے کہ بھارت نے اپنا جاسوسی نیٹ ورک مغربی ممالک میں وسیع پیمانے پر پھیلا رکھا ہے اور مقامی ایجنٹس کی تعداد میں بھی اضافہ کردیا ہے۔امریکی جریدے کی رپورٹ کے مطابق مودی حکومت کی جانب سے بھارتی خفیہ ایجنسی راکو کسی بھی ملک میں قتل جیسی کارروائیاں تک سرانجام دینے کی مکمل اجازت دے دی گئی ہے۔

رپورٹ کے مطابق مودی سرکار کے اقتدار میں آتے ہی بھارت کی دفاعی پالیسی نے پر تشدد رنگ اختیار کرلیا تھا، 2014 میں بھارتی نیشنل سکیورٹی ایڈوائزر نے دوسرے ممالک کو کھلم کھلا دھمکی دیتے ہوئے کہا تھا کہ اب ہم وہاں وار کریں گے جہاں سے جرم سرزد ہو رہے ہیں۔

(جاری ہے)

رپورٹ کے مطابق بھارت نے اپنے من گھڑت الزامات کی جوابی کارروائی کے طور پر دنیا بھر میں قتل و غارت پھیلانا شروع کر دیا، ہمسایہ ممالک پر دہشتگردی کے بے بنیاد الزام لگانا بھارتی ایجنسی را کی پرانی روش ہے جبکہ مودی راج میں ہمسایہ ممالک کے خلاف جھوٹے پروپیگنڈوں میں بھی اضافہ دیکھنے میں آیا ہے رپورٹ میں کہا گیاکہ کینیڈین وزیراعظم کے انکشافات کے بعد بھارت کی جارحانہ دفاعی پالیسی کھل کر دنیا کے سامنے آگئی ہے، ماضی میں بھی بھارت دوسرے ممالک میں مداخلت کرتا رہا ہے جن میں پاکستان کے خلاف گوریلا فورس کو تیار کرنا بھی شامل ہے۔