Live Updates

بنارسی ٹھگوں کا ٹولہ قوم کو تباہی کی دلدل میں اتارنے کے بعد نیا منجن بیچنے میدان میں نکلا ہے‘ پی ٹی آئی ترجمان

بدھ 4 اکتوبر 2023 15:55

لاہور(اُردو پوائنٹ اخبارتازہ ترین - این این آئی۔ 04 اکتوبر2023ء) پاکستان تحریک انصاف کے ترجمان نے مسلم لیگ (ن) کے سیکرٹری جنرل احسن اقبال کی پریس کانفرنس پر اپنے رد عمل میں کہا ہے کہ بنارسی ٹھگوں کا ٹولہ قوم کو تباہی کی دلدل میں اتارنے کے بعد نیا منجن بیچنے میدان میں نکلا ہے ،پچھلے 16ماہ میں اس گروہ کی مجرمانہ کارکردگی کڑے احتساب کی متقاضی ہے ،یہ لوگ اپنی مجرمانہ نالائقیوں اور نااہلیوں پر شرمسار ہوکر قوم سے معافی مانگنے کی بجائے نہایت بے شرمی سے ایک مرتبہ پھر قوم کو بے وقوف بنانا چاہتے ہے ۔

اپنے بیان میں ترجمان پی ٹی آئی نے کہا کہ پچاس روپے کے اسٹام پر چار ہفتوں کے لئے پلیٹلیٹس پورے کرنے کی غرض سے لندن بھاگنے والا بزدل اور اشتہاری وطن واپسی کی جرات کرے ، عوام اس کے محاسبے کے لئے تیار ہیں،تین روز قبل شاہدرہ کے عوام نے سسلین مافیا کے اس مجرم اور بزدل سرغنہ کو دو ٹوک پیغام دیا ہے۔

(جاری ہے)

ترجمان نے کہا کہ پی ٹی آئی چیئرمین نے شفاف ترین اور عوامی بہبود کے حوالے سے تاریخ کی متحرک ترین حکومت چلائی، دیوالیہ پن کے کنارے پر کھڑی معیشت کو عمران خان نے نہایت محنت سے کورونا سے بچا کر چھ فیصد کی سالانہ ترقی کے سطح پر مستحکم کیا، احسن اقبال جیسا جھوٹا شخص غیرت و حمیت کا مظاہرہ کرتے ہوئے قوم کو بتائے کہ ہم نے عمران خان کے خلاف سازش کی تو مہنگائی ساڑھے گیارہ فیصد کے آس پاس تھی، جھوٹا درباری قوم کو بتائے کہ 17ماہ پہلے پیٹرول آج سے آدھی سے بھی کم قیمت پر عوام کو میسر تھا ، یہ درباری بتائے کہ 17ماہ قبل بجلی کی قیمتیں آج کے مقابلے میں ایک تہائی سے بھی کم جبکہ اشیا ئے خورو نوش عمومی طور پر کئی گنا سستی تھیں۔

این آر او لے کر ملک سے بھاگنے اور لندن منصوبے کے تحت ضمانتوں کے سائے میں وطن واپسی کا ڈھونگ رچانے والے اپنے منصوبوں میں کامیاب نہیں ہوں گے۔ترجمان نے کہا کہ غیر جمہوری ،غیر آئینی اور غیر سیاسی قوتوں کے اشاروں پر پھدکتی کٹھ پتلیوں کو عوام اپنے ووٹ کے نیچے دفن کریں گے ۔