ضلع سوات میں 27نومبر سے 1دسمبر 2023 تک انسداد پولیو قطرے پلانے کی قومی مہم شروع کی جائیگی

جمعرات 23 نومبر 2023 23:04

پشاور(اُردو پوائنٹ اخبارتازہ ترین - آن لائن۔ 23 نومبر2023ء) ضلع سوات میں 27نومبر سے 1دسمبر 2023 تک انسداد پولیو قطرے پلانے کی قومی مہم شروع کی جائیگی اس سلسلے میں ضلعی انسداد پولیو کمیٹی کا اجلاس ڈپٹی کمشنر سوات ڈاکٹر قاسم علی خان کی زیرِ صدارت منعقد ہوا جس میں پانچ روزہ انسداد پولیو قطرے پلانے کے مہم کے انتظامات کا جائزہ لیا گیا۔اجلاس میں تمام اسسٹنٹ کمشنر ز لائیو ویڈیو لنک پر شریک ہوئے جبکہ ڈی ایچ اوسوات محمد سلیم،این سٹاپ آفیسر ڈاکٹر ذیشان، تعلیم، صحت، پولیس اوردیگر متعلقہ محکموں کے افسران اور نمائندوں نے شرکت کی۔

(جاری ہے)

فورم کو این سٹاپ آفیسر ڈاکٹر ذیشان نے بریفنگ دیتے ہوئے کہا کہ ضلع بھر میں مہم کے دوران 314800 گھرانوں میں موجود 472268 بچوں کو گھر گھر جاکر پولیو ویکسین کے قطرے پلائے جائینگے جس کیلئے 450 ایریا انچارج اور 100 یونین کونسل میڈیکل آفیسرزکے زیرنگرانی 2002 ٹیمیں تشکیل دی جاچکی ہیں جوبچوں کو گھر گھر جاکرپولیو سے بچاؤ کے ویکسین پلائیں گے اس کے علاوہ ضلعی انتظامیہ اور محکمہ صحت کے 22 افسران بطور ڈی پی ایم ٹی ضلعی سطح پر جبکہ 72 ٹی ٹی ایم یونین کونسل سطح پر اس مہم کی نگرانی کرینگے اجلاس سے خطاب کرتے ہوئے ڈپٹی کمشنر سوات ڈاکٹر قاسم علی خان نے عوام سے اپیل کی کہ اپنے تمام پانچ سال سے کم عمر کے بچوں کو پولیوقطرے ضرور پلوائیں انہوں نے کہا کہ عوام پولیو اہلکاروں کے ساتھ بھرپور تعاون کریں اور ایک محب وطن شہری کی حیثیت سے پولیو جیسے مہلک مرض سے نجات کے لئے حکومت کا ساتھ دیں بعد ازا ں ڈپٹی کمشنر سوات ڈاکٹر قاسم علی خان نے بچے کو پولیو قطرے پلاکر ضلع سوات میں مہم کا افتتاح کر دیا