Live Updates

نوازشریف کے وزیراعظم بننے کے لیے لابنگ ہو رہی ہے

ن لیگ اس وقت پنجاب میں سوئپ کر رہی ہے اس کے مقابلےمیں کوئی جماعت اتنی مضبوط نہیں، پی ٹی آئی اس وقت بہت مشکلات میں ہے اگر نئے امیدوار آتے ہیں تو ان کے پاس وقت کم ہے۔راجہ ریاض

مقدس فاروق اعوان ہفتہ 25 نومبر 2023 14:36

نوازشریف کے وزیراعظم بننے کے لیے لابنگ ہو رہی ہے

اسلام آباد ( اُردو پوائنٹ اخبارتازہ ترین ۔ 25 نومبر 2023ء ) سابق اپوزیشن لیڈر راجہ ریاض کا کہنا ہے کہ صرف ایک چیز کی لابنگ ہو رہی ہے کہ نوازشریف انشاء اللہ وزیراعظم بنیں گے۔انہوں نے اے آر وائی نیوز سے منسلک سینئر صحافی نعیم اشرف بٹ کو انٹرویو دیتے ہوئے مزید کہا کہ پی ٹی آئی اس وقت بہت مشکلات میں ہے اگر نئے امیدوار آتے ہیں تو ان کے پاس وقت کم ہے۔

اس وقت صرف ایک چیز کی لابنگ ہو رہی ہے کہ نوازشریف وزیراعظم بنیں گے۔ن لیگ اس وقت پنجاب میں سوئپ کر رہی ہے اس کے مقابلےمیں کوئی جماعت اتنی مضبوط نہیں۔ راجہ ریاض کا کہنا ہے کہ عدم اعتماد سے دو ماہ پہلے ن لیگ سے ہمارے مذاکرات میں سب کچھ طے ہوا۔ہماری بات شہباز شریف اور راناثناء اللہ سے ہوتی تھی پھر شہباز شریف فون پر نوازشریف کو بتاتے تھے۔

(جاری ہے)

عدم اعتماد سے پہلے جو طے ہوا اس پر ہم اور وہ قائم ہیں۔ہم نے طے کیا ہوا تھا کہ عمران خان کو وزیراعظم نہیں رہنے دینا۔پی ٹی آئی کا چئیرمین ہماری عزت نہیں کرتا تھا اور اس کا سیکرٹری ہمارا فون نہیں سنتا تھا۔راجہ ریاض نے مزید کہا کہ اعظم خان اب وعدہ معاف گواہ بن گیا ہے وہ پہلے فرعون بنا ہوا تھا۔ عمران خان کی اتنی ہمت نہیں تھی کہ گھنٹی بجا کا اعظم خان کو میٹنگ میں بلا لے۔

اعظم خان تو اسد عمر اور شاہ محمود قریشی کو لفٹ نہیں کرواتا تھا۔پتہ نہیں عمران خان کی کیا مجبوری تھی۔راجہ ریاض نے کہا کہ عدم اعتماد سے پہلے عمران خان کو سپورٹ نہیں تھی، ان کے اوپر سے ہاتھ کھینچ لیا گیا تھا۔ہمیں پتہ چلا کہ ایک جرنیل کے ذریعے ہمیں لاجز سے اٹھانے کی کوشش ہونا تھی اس لیے سندھ ہاؤس چلے گئے۔لیکن جب ہمیں نہیں اٹھایا گیا تو اس کا مطلب ہے ہاتھ کھینچ لیا گیا تھا۔

جب ہمیں نہیں اٹھانے دیا گیا تو اس کا مطلب تھا کہ عدم اعتماد کامیاب ہو جائے گی۔ہم نے تو کشتیاں جلا دی تھیں اور عدم اعتماد میں ووٹ ڈال کر نااہل ہونے کو تیار تھے۔اس دن ایوان میں بھی موجود تھا لیکن شہباز شریف نے ہمیں ووٹ دینے سے منع کر دیا تھا۔شہباز شریف نے جس سے جو وعدہ کیا پورا کیا جس کے لیے میں ان کا مشکور ہوں۔سابق اپوزیشن لیڈر نے مزید کہا کہ ہمارے گروپ کے 8 لوگ ن لیگ کے علاوہ کہیں اور جانا چاہتے ہیں۔