Live Updates

چیئرمین پی ٹی آئی کی بیٹوں سے بات نہ کرانے پر اڈیالہ جیل کے سپرنٹنڈنٹ آئندہ سماعت پر طلب

منگل 28 نومبر 2023 21:00

اسلام آباد(اُردو پوائنٹ اخبارتازہ ترین - آن لائن۔ 28 نومبر2023ء) اسلام آباد کی آفیشل سیکرٹ ایکٹ عدالت نے چیئرمین پی ٹی آئی کی بیٹوں سے بات نہ کرانے پر عدالت نے اڈیالہ جیل کے سپرنٹنڈنٹ کو آئندہ سماعت پر طلب کرلیا اور کہا کہ ہم نے ابھی درخواست پر فیصلہ نہیں دیا دیکھ رہے ہیں۔ تفصیلات کے مطابق اسلام آباد کی آفیشل سیکرٹ ایکٹ عدالت میں چیئرمین پی ٹی آئی کی بیٹوں سے بات کرانے کی درخواست پر سماعت ہوئی۔

چیئرمین پی ٹی آئی کی ہمشیرہ علیمہ خان روسٹرم پر آگئی۔اور مؤقف پیش کیا کہ عدالت نے آرڈر جاری کیا تھا کہ عمران خان کی بچوں سے بات کرائی جائے لیکن جیل حکام مان نہیں رہے۔عدالت نے ریمارکس دیئے کہ جیل حکام نے جواب دیاکہ بیرون ملک بات نہیں کرسکتے۔ہم نے ابھی درخواست پر فیصلہ نہیں دیا، دیکھ رہے ہیں۔

(جاری ہے)

علیمہ خان نے مؤقف اختیار کیا کہ جیل انتظامیہ نے کس قانون کیتحت یہ جواب دیا۔

وکیل شیراز احمد رانجھا نے استدعا کی کہ جیل حکام سے بات کرانے سے متعلق قوانین منگوا لیے جائیں۔اس میں کیا ہے، جیل ایس او پیز منگوائے جائیں۔وکیل علی بخاری نے استدعا کی کہ بیرون ملک کال کا خرچہ ڈال سکتے ہیں۔ماڈرن دور ہے۔بچوں سے بات انسانی ہمدردی کے طور پر دیکھا جائے۔خصوصی عدالت نے سپرنٹنڈنٹ اڈیالہ جیل کو آئندہ سماعت پر طلب کرلیا۔